Эрүүл мэндийн яамнаас халдварын нөхцөл байдлын талаар мэдээлж байна.

ЭМЯ-ны хэлтсийн дарга Д.Баярболд:
Хичээлийн шинэ жил эхлэх гэж буйтай холбогдуулан Эрүүл мэнд болон Боловсролын сайдын хамтарсан тушаал гарсан. Үүнд 4-5 настай хүүхдийн бүлгийн анги дүүргэлт 20-25 хүүхэд хэтрүүлэхгүй, сургалтыг холимог буюу танхимын болон цахим хэлбэрээр зохион байгуулна. Дуу хөгжим болон биеийн тамирын хичээлийг хийхгүй.

ЕБС-д мөн ялгаагүй 20-25 хүүхэд хичээллүүлэх ба 5/9 зарчмаар буюу долоо хоногоор ээлжилж, сургалтын холимог хэлбэрээр явна. Дельта хувилбарын тархац ихэсвэл хүүхдүүд 4/10 зарчмаар хичээллэнэ. Нэг ангийн нэг хүүхэд өвдсөн бол ангиараа зайнаас хичээллэнэ. 12-оос доош насны хүүхдүүд вакцинд хамрагдаагүй учир нэг ангид нэг хүүхэд өвчилбөл долоо хоног зайнаас, 12-оос дээш насны сурагчтай ангид гурван өвчлөл бүртгэгдвэл долоо хоног цахим хэлбэрт шилжинэ.

Сургууль, цэцэрлэгийн бүх хаалгыг бүрэн ашиглана, давхар хооронд бөөгнөрөл үүсгэхгүй байх нөхцөлийг бүрдүүлнэ. Тандалт судалгааны баг ажиллана. Эцэг эхчүүд хүүхдийн хувцас солих өрөөнд орохгүй. Сургууль дээр байх хугацааг аль болох бага байлгахаар зохицуулна. Өвлийн улиралд цонх онгойлгох боломжгүй байдаг учир бүх сургууль, цэцэрлэгт механик агааржуулалтын системийн шалгаж, зөвлөмжийг хүргүүлсэн. Сургуульд бүгд масктай байх ёстой бол одоогийн тушаалаар цэцэрлэгт багш масктай, хүүхэд маскгүй байна гэж байгаа ч хэрэв тархалт ихэсвэл хүүхдүүдийг маск зүүх ёстой хэмээн өөрчлөхийг үгүйсгэхгүй.

Нийтийн эрүүл мэндийн тусламжийн бодлогын хэрэгжилтийг зохицуулах газрын дарга Л.Энхсайхан:
Коронавирусийн халдвар аваад эдгэрсэн ч шинж тэмдэг 4-7 сар цаанадаж нэг жилийн хугацаанд үргэлжлэх тохиолдол байна. Үүнд ядарч сульдах, толгой өвдөх, анхаарал сулрах, үс унах, нойргүйдэх, гэдэс эвгүйрхэх гэх мэт шинж тэмдгүүд багтана. Цаашлаад 50 гаруй төрлийн шинж тэмдэг илэрч байна. Халдвар авахгүй байх, түүнээс сэргийлэх арга замууд тодорхой. Хүн хоорондын зай барьж, амны хаалтаа зүүх юм.  Халдварыг танихгүй хүнээс илүүтэй дийлэнхдээ ойрын хүнээс буюу хамтран ажиллагч, гэр бүл, төрөл төрөгсөд, найз нөхдөөсөө авдаг. Тиймээс элдэв найр наадам, цугларалтад очихоос татгалзахыг анхааруулж байна.

ЭМЯ-ны хэвлэлийн төлөөлөгч Б.Ууганбаяр:
Өнгөрсөн саруудад хөдөө орон нутагт 400 гаруй найр наадам болсон гэсэн мэдээлэл байна. Үүнээс үүдэж хөдөө орон нутагт коронавируст халдварын тохиолдол нэмэгдэж байна. Мөн дотоодын аялагчдыг ихээр хүлээж авсан аймагт халдвар бүртгэгдэх нь их байна. Хүүхдийн үсний найр, хурим, шагналын найр зэргийг хийх, олон хүн цуглуулах эсэх нь тухайн иргэдийн цэвэр ухамсрын асуудал. Тиймээс эрсдэлээ тооцоолон халдвар хамгааллын дэглэмээ баримтлахыг зөвлөе.