Ахмадуудын эрхийг хамгааллах чиглэлээр ажилладаг ТББ-ууд нэгдэж, Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай хуулийн төслийн талаар мэдээлэл хийж байна.

Үндэсний аюулгүй байдлын зөвлөлийн тэтгэврийн зээлийг тэглэх зөвлөмжийн дагуу боловсруулсан тэтгэврийн зээлийг тэглэх хуулийн төсөл өнөөдөр батлагдвал цаашид маш сөрөг үр дагавартай болохыг ахмадууд хэлж байна. 

Ахмадын төлөөлөл н.Бямбаа "Өнөөдөр хэрэглээд маргааш үх гэдэг золбин улс төр, судалгаагүй шийдвэр гаргаж болохгүй. Өнөөдөр улс төр гэж харж байна. Маргааш Монгол Улсын эдийн засаг яах вэ гэдгийг огт бодохгүй байна" гэсэн юм. 

Тэтгэврийн зээлийг ядарсан ахмадуудад өгдөггүй бөгөөд батлан даагч авч ирэх шаардлага тавьдаг болохыг тэд хэлсэн юм. 

Мөн насаараа ажиллаж хуримтлуулсан мөнгөө урьдчилж авахын тулд хүү төлж байгаа нь шударга бус бөгөөд тэтгэврийн доод хэмжээг 500 мянган төгрөгт хүргэх ёстойг хэлэв. Ажиллаж байх хугацаандаа сар бүр төлж, цуглуулсан тэтгэврээ эргүүлэн авч байхад нас барсны дараа үр хүүхдүүдээр нь төлүүлж байгаа нь ч төр иргэдээ шулж байгаа нэг хэлбэр гэдгийг хэлсэн юм. 

Ахмадууд тэтгэврийн зээлийг тэглэх асуудлаар өөрсдийн бодлыг хэлж байна. 

• Би өөрөө зээлтэй, зээлийг маань тэглэчихээсэй гэж хүсэхгүй байна. Ахмадуудыг алагчлахгүй, тэгш хүртээгээсэй гэж хүсэж байна.
• Би 320 мянган төгрөгийн тэтгэвэртэй, зээл авдаггүй. Жилдээ хоёр удаа цагаан сарын өмнө хүүхдүүдээрээ баталгаа гаргуулж байж л зээл авдаг. Гэтэл зээл аваагүй иргэдийг бололцоотой гээд байх юм. Би төлж чадахгүй болохоороо л зээл авч чадахгүй байгаа юм. Дөрвөн хүүхэд маань ипотекийн зээлтэй учраас тэдэнд дарамт болохыг хүсдэггүй. ҮАБЗөвлөл иргэдийг талцуулсан, бухимдуулсан зөвлөмж гаргасан. Үүнийг зогсоох ёстой. Хэрэв ахмадуудыг тэтгэнэ гэж байгаа бол сонгуулийн дараа нухацтай авч үзэх ёстой. 
• Улсад тасралтгүй 35 жил ажиллаж, гавьяаныхаа амралтад гарсан. Зээл аваагүй 194 мянган ахмадын төлөөлөл болон хэвлэлийн хуралд оролцож байна. Зээл аваагүй ахмадуудыг баян тарган, боломжтой гэж үзэж байх шиг байна. Үндсэн хуулийн зарчмыг энэ хуулийн төсөл зөрчиж байна. 2021 онд нэг сая төгрөгийн ваучер олгоно гэж байна. Эргэлтэд ороогүй ордыг үнэт цаас болгоно гэж юу яриад байгаа юм бэ. УИХ-ын эмэгтэй гишүүд Д.Оюунхорол, Д.Сарангэрэл нар үнэхээр хатуу сэтгэлтэй байна. Сонгуулийн шоу хийж байна. 320 мянган төгрөгийн тэтгэвэртэй ахмадууд хүүхдүүддээ дараа болохгүй гэж батлан даагч болгохгүй гээд зээл аваагүй байна шүү дээ. 2020 оны нэгдүгээр сарын 1-нээс хөдөлмөрийн хөлсний доод хэмжээ 420 мянга болсон. Үүнтэй холбоотой тэтгэврийн доод хэмжээг 400 мянган төгрөгт хүргэх хүсэлтэй улс төрч алга.