УИХ-ын чуулган хуралдаж байна.

Засгийн газар 2019.09.17-ны өдөр өргөн мэдүүлсэн  Эрүүгийн хуульд нэмэлт, өөрчлөлт оруулах тухай, Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай, Зөрчил шалган шийдвэрлэх тухай хуульд нэмэлт, өөрчлөлт оруулах тухай, Зөрчлийн тухай хуульд нэмэлт, өөрчлөлт оруулах тухай, Шүүхийн шийдвэр гүйцэтгэх тухай хуульд нэмэлт, өөрчлөлт оруулах тухай, Шүүхийн тухай хуульд нэмэлт оруулах тухай хуулийн төслүүд болон хамт өргөн мэдүүлсэн бусад хуулийн төслүүдийн анхны хэлэлцүүлгийг хийж байна.

Мөрийтэй тоглоомыг Эрүүгийн хуульд оруулж байгаа нь зөв боловч оруулж ирэхдээ олон нийтийн газар гэдгээр тусгах нь хувийн эзэмшилдээ зохион байгуулж байвал хэрхэн зохицуулах талаар УИХ-ын О.Баасанхүү асуулаа. Мөн аз туршин, урьдчилан үр дүнг төсөөлөх боломжгүй гэсэн байгаа нь сугалаа тухайлбал, НӨАТ, зарим төрлийн сугалааг оруулж ойлгох боломжийг бий болгож байгааг хэллээ. 

Харин УИХ-ын гишүүн Х.Нямбаатар 2015 оны Эрүүгийн хуулиар мөрийтэй тоглоомыг эрүүгийн гэмт хэрэг биш хэмээн Зөрчлийн хуульд оруулахаар болсон гэдгийг хэллээ. Хуулиар хориглосон гэхээр НӨАТ-ын сугалаа орохгүй бөгөөд казино, цахим боломжийг ашигласан мөрийтэй тоглоомыг хориглож байгааг тайлбарлалаа. 

Ингээд санал хураалт явуулахад чуулганы хуралдаанд оролцож буй 45 гишүүний 23 нь дэмжсэнээр мөрийтэй тоглоом зохион байгуулсан бол эрүүгийн хуулиар хариуцлага хүлээлгэхээр боллоо. 

УИХ-ын чуулганд 75 гишүүний 40 нь оролцож, хуулийн төслүүдийг хэлэлцэж байна. 

Горимын саналаар Зөрчлийн тухай хууль болон Зөрчил хянан шийдвэрлэх тухай хуулийг хойшлуулж, УИХ-ын сонгуулийн тухай хуулийг хэлэлцэх горимын саналыг гаргаж, 42 гишүүний 66.7 хувийн саналаар дэмжигдлээ.