Эзэн Чингис хааны мэндэлсэн өдрийг өвлийн тэргүүн сарын шинийн нэгэнд хийдэг уламжлал тогтоод долоон оныг үдэж байна. 2012 оны арваннэгдүгээр сард шонхор шувууг залах ёслол үндэсний хүчит бөхийн барилдаан зохион байгуулж улсын аварга тухайн үед заан цолтой байсан Ч.Санжаадамба Ц.Содномдорж харцагыг даван түрүүлж байсан удаатай.

Хоёр дахь барилдаанд мөн л Ч.Санжаадамба заан цолтой түрүүлж, улсын аварга С.Мөнхбат үзүүр булааж байв.

Гурав дахь барилдаанд улсын харцага одоогийн улсын гарди Ө.Бат-Орших найм даван түрүүлж улсын аварга С.Мөнхбат дахин үзүүр булаав.

Дөрөв дэх барилдаанд Пүрэвийн Бүрэнтөгс арслан түрүүлж, улсын начин Л.Цэрэнтогтох үзүүрлэв. Энэ удаа чансаа өндөр 128 бөх барилдав.

Тав дахь барилдаанд улсын арслан Рэнцэнбямбын Пүрэвдагва тэргүүн байрын төлөө улсын начин Эрдэнэбатын Дашийг өмсөх мэхээр орхин түрүүлж байлаа.

Зургаа дахь барилдаанд улсын гарди Н.Ганбаатар түрүүлж, улсын начин Э.Даш үзүүрлэв. Их шөвөгт улсын харцага Б.Бат-Өлзий шалгарав.

Өнгөрсөн жилий Бахархалын өдрийн барилдаанд Буянт Ухаагийн спортын ордонд болж одоогийн харцага тухайн үеийн начин Доржийн Анар түрүүлж, улсын харцага Б.Бат-Өлзий үзүүр булааж байв. Энэ хоёр бөх төрийн наадмын харцагын даваанд зун нь тунасан түүхтэй.

А.Одбаяр