Баянзүрх дүүргийн 27 дугаар хорооны нутаг дэвсгэр, Дарь-Эхэд байрлах авто замын хажууд явган зорчигчийн явах хэсэгт барьсан “зүйл” цахим орчинд хэлэлцүүлгийн сэдэв болов.

Иргэд дээрх зургийг харж “Унадаг дугуйн зам уу, ус зайлуулах хоолой юу” зэргээр таамаглал дэвшүүлэн шүүмжилжээ.

Бид энэ талаар тодруулахаар Баянзүрх дүүргийн 27-р хорооны Засаг даргатай холбогдоход “Энэ нь Нийслэлийн авто замын хөгжлийн газраас хийж буй ажил. Өнгөрсөн оны долоодугаар сард эхэлсэн. Газар гэсэж, урин дулаан болохоор үргэлжлэх юм” гэв.

Энэ бол 10 см гүнтэй, гадаргуун ус зайлуулах шуудуу юм

Нийслэлийн авто замын хөгжлийн газрын Гүүрний хяналтын мэргэжилтэн Я.Өнөртүвшинтэй холбогдон, энэ талаар тодруулахад “Энэ бол 10 см гүнтэй, гадаргуун ус зайлуулах шуудуу юм. Үүнийг хүмүүс явган хүний зам гэж андуурч байна. Барилгын ажлын зургийн дагуу ус зайлуулах шуудууны ажил хийгдсэн. Дөрөвдүгээр сарын сүүлчээр тэр хэсэгт явган хүний замын ажил эхэлнэ. Өнөөдрийн байдлаар суурь нь хийгдээд, асфальтан хучилт хийгдээгүй байгаа.

Гадаргын ус буюу борооны усыг зайлуулах хоёр төрлийн байгууламж байдаг. Нэг нь авто замын зорчих хэсэгт байдаг шүүлтүүртэй, шүүрт худгууд. Нөгөөх нь дээрхтэй адил ус зайлуулах шуудуу юм” гэлээ.

Явган хүний зам болон, ус зайлуулах шуудууны бүтээн байгуулалтын төсөвт өртгийн талаар мэргэжилтнээс асуухад “Харж байж хэлэхгүй бол шууд хэлж мэдэхгүй байна” хэмээсэн юм.

Бид энэ талаарх мэдээллийг дахин тодруулан хүргэх болно.

НЭМЭЛТ:

Нийслэлийн Авто замын хөгжлийн газраас уг авто замын шинэчлэлийн ажлын талаар дараах нэмэлт мэдээллийг өгөв.

Барилгын ажлын нэр: Түлхүүр гардуулах гэрээний нөхцөлтэй “Дарь-Эхийн авто замын шинэчлэлт /3,3км/ /БЗД/”-ийн ажил

Гүйцэтгэгч: “Зэст хөлөг” ХХК

Гэрээт хугацаа: Гэрээний дугаар НХААГ-19/106, гэрээ байгуулсан огноо 2019/11/11, эхлэх дуусах хугацаа 2019/11/11-2021/06/30

Төсөвт өртөг: 2 199 188 753 төгрөг

Санхүүжилтийн эх үүсвэр: Нийслэлийн Замын сан 

Зураг төсөл зохиогч: “Эйч Ай Би” ХХК

Захиалагч: Нийслэлийн Засаг даргын тамгын газар

Захиалагчийн хяналтыг хэрэгжүүлэгч байгууллага: Нийслэлийн Авто замын хөгжлийн газар

Гэрээт ажлын хүрээнд төлөвлөсөн ус зайлуулах ил шуудуу, явган хүний замын зураг төслийн талаарх тайлбар:

Барилга угсралтын ажлын зураг төсөл 2020 онд магадлалаар орж батлагдсан. Энэхүү зураг төсөлд явган хүний зам, ус зайлуулах ил шуудууг дараах байдлаар тусгасан. Үүнд:

• Явган хүний зам: Асфальт бетон хучилттай зузаан 3см, өргөн 1,54-2,0м, зорчих хэсгийн хоёр талаар 1,5 км хийгдэх,
• Ус зайлуулах ил шуудуу: Өргөн 0,46м, гүн 0,1м, авто замын зүүн талаар 3,3км хийгдэхээр төлөвлөсөн.