Монцамэ агентлагаас эрхлэн гаргадаг "Хүмүүн бичиг" сониноос "Монголын сайхан бичигтэн 2021" улсын уралдааныг 25 дахь жилдээ зохион байгууллаа.

Оролцогчдын хамгийн ахмад нь 99 настай С.Жигмидсүрэн байсан бол хамгийн залуу нь 1-р ангийн сурагч Б.Урантогос байлаа

Уралдаанд Баян-Өлгий, Говь-Алтай аймаг, нийслэлийн Багахангай дүүргээс бусад аймаг, дүүргийн 1500 хүн оролцжээ.

Сурагчдын 1-7-р ангийн ангилалд Хөвсгөл аймгийн Тосонцэнгэл сумын 2б ангийн сурагч Ү.Эмүжин түрүүлсэн бол түүний эгч Ү.Энхжин 8-12-р ангийн ангилалд мөн нэгдүгээр байрыг эзэлжээ.

Хөвсгөл аймгийн Тосонцэнгэл сумын 11б ангийн сурагч Ү.Энхжин "Хүмүүн бичиг сониноор дамжуулж Монгол бичгээ маш сайн сурч болох юм байна гэдэг санааг илэрхийлсэн. Бийрний болон хулсан үзгийн бичвэр гэсэн хоёр янзаар бичсэн. Манайх гэр бүлээрээ монгол бичгээ зөв сайхан бичдэг. Ээжийн бүтээл энэ үзэсгэлэнд тавигдсан" гэв.

Түүний бичвэр "Хүмүүн бичиг сонин бид хоёр хэмээхүй дор тэрээр миний хамгийн дотны найз мэт санагдана" хэмээн эхэлжээ.

"Сайхан бичигтэн анги" ангилалд 1-р байрыг Дархан-Уул аймгийн 16-р сургуулийн 12а анги эзэлсэн бөгөөд бэлтгэсэн багш Н.Цолмон "Монгол Улсын есөн хөлт цагаан туг, төрийн далбаа, сүлд, төрийн дуулал гэсэн төрийн бэлэгдлүүдийг 29 хүүхдийнхээ бүтээлээр нэгтгэсэн. Гаднын оронд ажиллаж амьдарч байгаа шавь нар маань Монгол хүн гэдгээрээ ялгарах ганц зүйл нь хэл бичиг, соёл юм шүү гэж хэлж байсан. Энэ санаанд үндэслэн нэг жилийн хугацаанд бүтээсэн" гэв.

Бичвэрийн бус бүтээлийн ангилалд Сэлэнгэ аймгийн Сайхан сумын 1-р сургуулийн багш Ж.Гэрэлмаа хос даалимба болон монгол бичгийн хээтэй зүү ороосон гоёлын дээлээр оролцон түрүүлсэн. Тэрээр 2014 онд сийлбэрлэсэн авдар, 2017 онд 108 эвхмэлээр тус тус тэргүүн байр эзэлж байжээ.

Харин Мэргэжлийн багш нарын ангилалд Нийслэлийн Сүхбаатар дүүргийн 1-р сургуулийн багш Ц.Норпил түрүүлсэн. Тэрээр монгол бичгийн дөрвөлжин, угалзан зэрэг эвхмэлийн тигийг хослуулан бичсэн ба Хүмүүн бичиг сонин нийгэмд ямар үүрэг гүйцэтгэсэн тухай өгүүлжээ.

Оролцогчдын хамгийн ахмад нь нийслэлийн Сүхбаатар дүүргийн 6-р хорооны иргэн, 99 настай С.Жигмидсүрэн байсан бол хамгийн залуу нь нийслэлийн Чингэлтэй дүүргийн 57-р сургуулийн 1б ангийн сурагч Б.Урантогос байв.

Уралдааны 12-р ангийн сурагчид ангилалд:

1. Хөвсгөл аймгийн Тариалан сумын ЕБС-ийн 12а ангийн сурагч Б.Анужин /МУИС/
2. Нийслэлийн Чингэлтэй дүүргийн 23-р сургуулийн 12а ангийн сурагч Ё.Золбоо /МУИС/
3. Дорнод аймгийн Хэрлэн сумын Хан уул цогцолбор сургуулийн 12в ангийн сурагч Э.Будсүрэн /МУБИС/
4. Дундговь аймгийн Сайнцагаан сумын Мандал сургуулийн 12а ангийн сурагч Х.Нандинцэцэг /МУБИС/ нар амжилттай оролцож Боловсролын зээлийн сангийн 100 хувийн буцалтгүй тэтгэлгээр суралцах эрхтэй боллоо.

Уран бичлэгийн ангилалд "Содон чимээ" сургалтын төвийн багш Б.Алтантуяа түрүүлсэн бол насанд хүрэгчдийн ангилалд Graph.mn сайтын сэтгүүлч Б.Баянжавзан түрүүлжээ.

Уралдаанд ирүүлсэн шилдэг бүтээлүүдийг Монголын уран зургийн галерейд байршуулжээ.