Өчигдрөөс эхлэн нийслэлийн ерөнхий боловсролын сургуулийн төгсөгчид батламжаа авч байна. Хөдөө орон нутагт батламжийг энэ сарын 30-нд өгч дуусах юм.
Үүнтэй зэрэгцээд Улаанбаатар хотноо төрийн болон төрийн бус томоохон их, дээд сургуулиудын элсэлтийн шалгалтын бүртгэл эхэлж байна. Тиймээс эдгээр сургуулийн элсэлтийн шалгалтын журам болон босго оноог танилцуулж байна.
МУИС: Элсэлтийн шалгалтын бүртгэл өнөөдөр эхлээд ирэх сарын 2-нд дуусах ажээ. Тус сургуульд суралцах сонирхолтой элсэгчдийн ерөнхий шалгалтын босго оноо нь сонгох мэргэжлийн хичээлээс хамааран янз бүр байгаа ажээ. Тухайлбал: математикийн ангид орох хүүхдүүд 785 оноо авсан байх шаардлагатай байхад түүхийн ангид орох элсэгчдийн шалгалтын босго оноо 428 байхад болох аж. МУИС өнөө жил нийт 2420 оюутан шинээр элсүүлэх юм байна. Вэб сайт www.num.edu.mn.
ЭМШУИС: Элсэлтийн бүртгэл нь ирэх сарын 3-6-ныг хүртэл үргэлжлэх бөгөөд суралцах хүсэлтэй элсэгчид өргөдөл болон бүрдүүлэх бичиг баримттайгаа ирж бүртгүүлэх ажээ. Уг сургууль хот, хөдөөгийн нийлсэн нийт 490 оюутан элсүүлэх бөгөөд босго оноо нь 80 хувиас дээш байсан тохиолдолд суралцах эрх авах юм байна.
ШУТИС: Энэ сургуульд элсэхэд босго оноо 400 байна. Шинэ хичээлийн жилд нийт 3180 оюутан элсүүлэх юм байна. Тус сургуулийн элсэлтийн шалгалтын бүртгэл өнөөдрөөс эхлэн ирэх сарын 2-ныг хүртэл үргэлжлэх юм байна. Вэб сайт www.must.edu.mn.
Их Засаг: Элсэлтийн шалгалтын бүртгэл уржигдраас эхэлсэн бөгөөд босго оноогоо 500-гаар тогтоожээ. Энэхүү онооноос 50 хувийг нь авсан тохиолдолд томилолт авах эрхтэй болох ажээ. Эдгээр сургуулиуд нь өөрсдийн элсэлтийн шалгалтын журмыг сургууль тус бүртээ дэлгэн тавьсан бөгөөд дэлгэрэнгүй мэдээллийг түүнээс харж болох юм байна. Мөн www.ikhzasag.edu.mn вэб сайтдаа энэхүү журмаа байрлуулсан ажээ. Сургалтын төлбөрөө намар авдаг журмаараа авахаас гадна төлбөрийн хэмжээ тодорхой хэмжээгээр нэмэгдэнэ гэсэн.
ХУИС: Тус сургуульд элсэхэд Ерөнхий шалгалтын авбал зохих онооны 50 хувийг авсан байх шаардлагатай. Энэ шаардлагыг биелүүлж чадсан бол өчигдрөөс эхлэн ирэх сарын 2-ныг хүртэл бүртгэж байна. Харин элсэгчдийн эцсийн дүнг ирэх сарын 15-ны дотор нийтэд зарлаж сургуулийнхаа вэб сайтад гаргах гэнэ. Сургуулийн сургалтын төлбөрийн хувьд эрхийн бичгээ авсан хүмүүс наймдугаар сарын 27-нд бүртгүүлэхдээ тушаасан байх шаардлагатай юм байна.
Санхүү эдийн засгийн дээд сургууль: Улаанбаатар хотын хувьд оюутан элсүүлэхдээ математикийн ерөнхий шалгалтын дүнгээр эхний 300-д, англи хэлний ерөнхий шалгалтын дүнгээр эхний 500-д багтсан сурагчийг бүртгэх аж. Шаардлага хангаж дүнгээ авч чадсан бол бүртгэлийн ажил ирэх сарын 4-нийг хүртэл сургууль дээр явагдана. Тус сургуулийн хувьд бусад сургуулиудаас харьцангуй хурдан буюу маргааш өдөр нь элсэгчдийн дүнг нэгтгэн гаргах юм. Элсэх эрх авсан хүмүүс наймдугаар сарын 23-26-нд сургалтын төлбөрөө тушаасан баримттайгаа ирж бүртгүүлнэ. Вэб сайт www.ife.edu.mn.
Худалдаа Үйлдвэрлэлийн дээд Сургууль: Энэ сургуульд элсэхийн тулд ерөнхий шалгалтын авбал зохих 200-800 онооноос 500 оноог авсан байх шаардлагатай. Оноонд тэнцэж тус сургуульд бүртгүүлсэн хүмүүсийн эцсийн дүнг долдугаар сарын 15-ны дотор шалгаруулалт хийж 20-ны дотор нийтэд мэдээлнэ. Харин хичээлийн бүртгэл наймдугаар сарын 20-25 хүртэл явагдах бөгөөд төлбөрөө төлж, томилолтоо авсан хүнд л хичээлд суух зөвшөөрөл олгох юм байна. Вэб сайт www.icb.edu.mn.
Шихихутуг хууль зүйн дээд сургууль: Тус сургуульд элсэх болзол нь ерөнхий шалгалтын авбал зохих онооны 50 хувийг авсан байх ёстой гэнэ. Бүртгүүлсэн хүмүүсийн шалгаруулалтыг наймдугаар сарын 10-ны дотор хийж элсэгчдийг 20-ны дотор бүртгэнэ. Төлбөрийн хувьд элсэх эрхийн бичгээ авахдаа төлсөн байх шаардлагатай гэнэ. Вэб сайт www.shihihutug.edu.mn
Соёл Урлагийн Их сургууль: Элсэх эрхийг ерөнхий шалгалтын оноо, урлагийн авьяас /ур чадвар/ гэсэн хоёр шалгалтын дүнг харгалзан олгоно. Өнөөдрөөс 30-ныг хүртэл бүртгэж ирэх сарын 5-нд эцсийн дүнг танилцуулах юм байна. Эрх авсан элсэгчдийн бүртгэл наймдугаар сарын 27-31-ний хооронд явагдах ажээ. Вэб сайт www.muca.mn.
Бэлтгэсэн Т.Гэрэлмаа
Я.МӨНГӨНЦЭЦЭГ