Хөрөнгийн зах зээл унасны улмаас дэлхийн хамгийн баян 500 бизнес эрхлэгч нийт орлогынхоо 2.1 хувийг алдсан тухай “Bloomberg” агентлаг мэдээллээ. Шалтгааныг АНУ, БНХАУ-ын худалдааны маргаан хурцадсантай холбогдуулан тайлбарлаж байна. Дэлхийн хамгийн баян хүмүүсийн хөрөнгө нэг хоногийн дотор нийт 117 тэрбум ам.доллароор буурсан аж. Тухайлбал:

• “Amazon”-ыг үүсгэн байгуулагч Жефф Безос- 3.4 тэрбум ам.доллар,
• “Louis Vuitton Moеt Hennessy” компанийн захирал Бернар Арно- 4 тэрбум ам.доллар,
• “Facebook” компанийг үүсгэн байгуулагч Марк Цукерберг- 2.7 тэрбум ам.доллар
• Энэтхэгийн бизнесмэн Мүкеш Амбани- 2.4 тэрбум ам.доллар
• “Microsoft”-ийг үүсгэн байгуулагч Билл Гейтс- 2 тэрбум ам.долларыг тус тус алджээ.

Түүнчлэн сүүлийн есөн долоо хоногийн турш болж буй Хонконгийн эсэргүүцлийн жагсаал тус улсын бизнес эрхлэгчдийн санхүүгийн зах зээлд нөлөөлж байгаа ажээ. Хонконгийн хамгийн баян 10 хүний хөрөнгө долдугаар сарын 23-наас хойш 19 тэрбум ам.доллароор буурсан байна.

АНУ-ын ерөнхийлөгч Дональд Трамп өнгөрсөн долоо хоногт Хятадын 300 тэрбум ам.долларын өртөг бүхий бараа бүтээгдэхүүнд есдүгээр сарын 1-нээс эхлэн шинээр 10 хувийн татвар ногдуулна гэдгээ зарласан. Уг шийдвэрийн хариуд БНХАУ-ын засгийн газар валютын ханшийг зориудаар сулруулах арга хэмжээг авсан юм. Үүний улмаас нэг ам.доллартой харьцах ханш хамгийн доод түвшинд хүрээд байна.

АНУ-ын эрх баригчид Хятадыг “currency manipulator” буюу валютын ханшыг удирдах замаар өөртөө давуу тал бий болгогч орноор зарлаад удаагүй байгаа билээ.

Эх сурвалж: Bloomberg