Халх гол суманд хэрэгжиж буй "Шинэ сум" төслийн бүтээн байгуулалтад хугацаат цэргийн алба хаагчид гар бие оролцож, хүч хөдөлмөрөө зүй ёсоор үнэлүүлж байна.

Тэртээ 80 жилийн өмнө тэнгэр халхалсан хар утаа Халхын голын хөвөөнд суунаглаж, халдах дайсны исгэрэх сум аадар адил шаагиж, Монгол Улсын дархан хил дээр дайны гал дүрэлзэж байв. Түүхийн хуудаснаа “Зарлаагүй дайн” хэмээн тэмдэглэгдсэн эл үйл явдлаас хойш 80 жил, 80 намар улирчээ. Нэг талаас ЗХУ, БНМАУ, нөгөө талаас Япон, Манж-Го гэсэн дөрвөн улс оролцсон эл дайн нийт 20 мянга гаруй хүний алтан амийг авч одсон гэдэг. Өдгөө үр хойч нь 80 намрын түүхэн жимээр эцэг өвгөдийнхөө алдаа оноог дэнслэн хөвөрсөөр. Монголын гэрэл зурагчдын нэгдсэн холбооноос зохион байгуулж буй “Mongolia today 2019” олон улсын гэрэл зурагчдын хамтарсан хөтөлбөрийн хүрээнд Дорнод аймагт ажиллаад ирлээ. Түүхэн ялалтын жимээр аялсан фото сурвалжилгаа хүргэж байна.