“Walt Disney”-ийн бүтээл “Avengers: Endgame” кино Хойд Америкийн “Box Office”-ийн жагсаалтыг гурав дахь долоо хоногтоо тэргүүлжээ. “Marvel”-ийн супер баатрын сэдэвт энэхүү кино өнгөрсөн амралтын өдрүүдэд Хойд Америкийн кино театруудаас 63.3 сая ам.долларын орлого олсон талаар “Comscore” мэдээллээ.

Харин олон улсад орлого нь 2.4 тэрбум ам.доллар хүрчээ. Ингэснээр бүх цагийн үеийн хамгийн өндөр орлого олсон кино жагсаалтад “Avatar”-ийн дараа хоёрдугаарт бичигдэж байна. Түүнчлэн энэ хоёр киноны өрсөлдөөн улам ширүүсэх төлөвтэй байна. Ийнхүү “Walt Disney”-ийн бүтээл энэ он гарснаас хойш “Box Office”-ийн жагсаалтыг хамгийн удаан тэргүүлсэн хоёр дахь киногоор нэрлэгдэж байгаа юм.

Үүнээс өмнө “Universal Pictures”-ийн “Glass” кино нэгдүгээр сарын эцсээс хойш дөрвөн долоо хоног тэргүүлж байсан юм. Түүнчлэн шинээр нээлтээ хийсэн “Pokemon Detective Pikachu” кино 54.3 сая ам.долларын орлогоор “Box Office”-ийн жагсаалтыг удаалжээ. “Pokémon”-ийн франчайзингийн анхны уран сайхны кино болон гарч байгаа энэхүү бүтээл 150 сая ам.доллароор бүтсэн бөгөөд олон улсын орлого нь 112.4 сая ам.доллароор хэмжигдэж байна.

Н.Номин-Эрдэнэ | @Nominerdene_NDN