Сэлэнгэ аймгийн Зүүнбүрэн сумын харьяат, Монгол улсын начин Чүлтэмийн Мөнхтогтохын нэрэмжит аймаг цэргийн цолтой болон залуу бөхчүүдийн барилдаан /АЦЦБЗББ/ энэ Бямба гараг буюу тавдугаар сарын дөрөвний 14:00 цагаас Монгол Бөхийн Өргөөнөө болно.

Чүлтэмийн Мөнхтогтох начин ардын хувьсгалын 78 жилийн ой буюу 1999 оны улсын баяр наадамд Увс аймгийн арслан Х.Тэсхүү, улсын заан Д.Лхагвасүрэн, улсын заан Д.Цэнд-Аюуш, дархан аварга Ж.Мөнхбат нарыг өвдөг шороодуулан тав давж “Монгол улсын начин” цол хүртсэн түүхтэй. Дархан даацтай мэхээрээ “Дүүгүүр” Мөнхтогтох хэмээн нэрлэгдсэн хүчтэн билээ.

Начны нэрэмжит барилдаанд аймаг, цэргийн цолтой болон залуу бөхчүүд оролцсон 256 бөх зодоглоно. Энэ барилдаан нь 2018-2019 оны улирлын ес дэх аймаг цэргийн цолтой болон залуу бөхчүүдийн барилдаан /АЦЦБЗББ/ юм. Ч.Мөнхтогтохын нэрэмжит барилдааныг SPS телевиз шууд дамжуулан хүргэнэ.

Т.Түмэндэмбэрэл