"Улаанбаатар төмөр зам" хувь нийлүүлсэн нийгэмлэгийн дарга Д.Жигжиднямаа нэгдүгээр сарын 3-ны өдөр Зам, тээврийн хөгжлийн сайд Я.Содбаатарт албан бичиг илгээжээ. 

Албан бичигт дурьдсанаар, Я.Содбаатар сайдын тушаалаар Зам-Үүд сумын нутагт байрлах барилга байгууламж хүлээн авахаар ЗТХЯ-наас комисс томилогдон арванхоёрдугаар сарын 27-29-нд явсан аж. Энэ ажилд нь зориулж Улаанбаатар төмөр зам ХНН-ээс тусгай хоёр вагон гарган үйлчилжээ. 

Комисст багтсан Зам тээврийн хөгжлийн яамны ажилтнууд 2018 оны 12 сарын 27-ны орой галт тэргээр зорчих үедээ архидан согтуурч, хоорондоо маргалдан вагоны эд зүйлийг эвдэж, шаардлага тавьсан төмөр замын ажилтнуудыг айлган сүрдүүлж, доромжилсон байна. 

Төмөр замын удирдлага энэ ёс бус асуудлаар Я.Содбаатар сайдад албан ёсоор хандаж, хавсралт гурван хуудас материал хүргүүлжээ.  

Энэ явдлын талаар ЗТХЯ-ны хэвлэлийн төлөөлөгчөөс өнөөдөр тодруулахад, Галт тэргэнд Зорчиж явсан “МТЗ” ТӨХК-ийн зарим ажилтан, мөн ЗТХЯ-ны нэр бүхий албан тушаалтнууд согтууруулах ундаа хэрэглэсэн тухай УБТЗ-ын дарга Д.Жигжиднямаагаас тус яаманд хандан (гомдол) мэдээлэл ирүүлсэн. Энэ дагуу ЗТХ-ийн сайдаас дээрх албан тушаалтнуудад хариуцлага тооцох үүрэг өгсөн. Үүргийн дагуу “МТЗ” ТӨХК-ийн хоёр ажилтныг үүрэгт ажлаас нь чөлөөлөх тухай яригдаж байна.

Харин ЗТХЯ-ны нэр холбогдсон хоёр албан хаагчийн хувьд нэг нь галт тэргээр зорчоогүй нь тодорхой болсон. Харин хоёр дахь хүний хувьд галт тэргэнд архи ууж, зорчин явагчдын амгалан тайван байдлыг алдагдуулсан үйлдэл гаргаагүй гэдгээ албан ёсоор бичгээр гарган өгсөн. Энэ тухайгаа УБТЗ дахь Цагдаагийн газарт хандан шалгуулах хүсэлтээ хүргүүлсэн байна. Хэрэв шалгалтаар галт тэргэнд зорчин явах үедээ согтууруулах ундаа хэрэглэсэн нь тогтоогдвол тухайн  албан хаагчтай байгуулсан хөдөлмөрийн гэрээг цуцалж, төрийн албанаас чөлөөлөх арга хэмжээ авах болно" гэсэн тайлбар өгөв.