АНЭУ-ын Дубай хотод болж буй Тусгай олимпын зуны 15 дугаар наадмын усан сэлэлтийн төрлөөс манай тамирчин Б.Элбэрэлт алтан медаль хүртлээ.

Тэрбээр эрэгтэйчүүдийн усан сэлэлтийн 25, 50, 100 метрийн ганцаарчилсан төрөлд оролцож буй бөгөөд өнөөдөр 25 метрийн мэлхий сэлэлтийн эрэгтэйчүүдийн төрөлд өрсөлдсөн алтан медаль хүртжээ. Маргааш Б.Элбэрэлт эрэгтэйчүүдийн 200 метрийн чөлөөт сэлэлтийн төрөлд өрсөлдөх юм байна. 

Тусгай олимпын Зуны 15 дугаар наадамд оролцож буй тамирчдын дунд дауны хам шинжтэй гурван тамирчин байгаагийн нэг нь Б.Элбэрэлт. Тэрбээр усан сэлэлтээр зургаан жилийн хугацаанд хичээллэж байгаа бөгөөд Хонгконгт болсон Зүүн Азийн бүсийн тэмцээнээс 25, 50 метрийн өврөөр даллах сэлэлтийн төрлөөс хүрэл медаль хүртэж байжээ. 

Харин эмэгтэйчүүдийн 25 метрийн мэлхий сэлэлтийн төрөлд өрсөлдсөн Э.Гүнжсүрэн шагналт дөрөвдүгээр байрт шалгарсан байна. Түүний хувьд өчигдөр эмэгтэйчүүдийн 50 метрийн мэлхий сэлэлтийн төрөлд шагналт тавдугаар байрт орсон байна. 

Ширээний теннисний ганцаарчилсан төрлөөс хос мөнгөн медаль хүртлээ

Тусгай олимпын зуны 15 дугаар наадам ширээний теннисний төрөлд ганцаарчилсан төрлөөр оролцсон У.Нинжбадам, Б.Амарболд нар хоёул мөнгөн медалийн эзэд болжээ.

Тэд өнөөдөр, маргааш хосын төрөлд хүч үзнэ. Б.Амарболдын хувьд 130 дугаар сургуульд суралцдаг бөгөөд ширээний теннисээр гурван жил хичээллэсэн бөгөөд олон улсын тэмцээнүүдээс найман медаль хүртээд байгаа аж.

Монгол Улс 2013 онд БНСУ-д болсон Тусгай олимпын өвлийн наадамд хоёр тамирчнаа илгээсний нэг нь У.Нинжбадам. Түүний анхлан алхсан энэхүү замаар манай улсын олон тамирчин алхаж, энэ удаагийн Тусгай олимпын наадамд найман төрөлд өрсөлдөх 28 тамирчин Абу Дабид ирээд байгаа талаар зохион байгуулагчдын зүгээс мэдээлж байна.