БНХАУ-аас Монгол улсад олгож буй хөнгөлөлттэй зээлийн хөрөнгөөр шинэ цэвэрлэх байгууламж барих ажил өнөөдөр эхэллээ.

Хүндрэл гарахгүй бол хугацаандаа хийх боломжтой гэдгийг албаныхан хэлсэн.

Энэ сарын 1-нд “Улаанбаатар хотын төв цэвэрлэх байгууламжийг шинээр барих” төслийн гэрээнд гарын үсэг зурах ёслол болсон билээ. Улаанбаатарын цэвэрлэх байгууламж хоногт 160 метр/куб бохир ус хүлээн авдаг. Харин шинэ байгууламж хоногт 250 мянган метр/куб бохир ус хүлээн авах хүчин чадалтай болох юм. Энэ байгууламжийг гурван жилийн хугацаанд барих бөгөөд хүндрэл гарахгүй бол 2022 онд буюу хугацаандаа хийх боломжтой гэдгийг албаныхан хэлсэн. Төслийн нийт өртөг 267 сая ам.доллар юм. 

Шинэ цэвэрлэх байгууламжийг ашиглалтад оруулсны дараа зүгшрүүлэх, тохируулалтын нэг жилийн хугацаа дуустал хуучин цэвэрлэх байгууламж зэрэг ажиллана бөгөөд үүнээс хойш зөвхөн шинэ нь ажиллуулах юм. 

Засгийн газар хоорондын хэлэлцээрийн хүрээнд төслийг гүйцэтгэхэд Монгол Улсын тал 50, БНХАУ-ын тал 50 хувийн үүрэг хүлээнэ. Ингэснээр барилгын материал, тоног төхөөрөмжийг дотоодын үйлдвэр, аж ахуйн байгууллагаас хангах юм.

Гэрэл зургийг: Д.Жавхлантөгс

Цэвэрлэх байгууламж ашиглалтад орсноор Улаанбаатар хотын ундны эх үүсвэр болсон Туул гол болон хүрээлэн буй орчны бохирдлыг бууруулах, ажлын байр нэмэх, хүн амын ажиллах амьдрах таатай нөхцөл бүрдүүлэх зэрэг нийгэм, эдийн, засаг, экологийн онцгой ач холбогдолтой гэдгийг албаны эх сурвалж хэлж байлаа.

Шинэ цэвэрлэх байгууламжийн цэвэрлэсэн усыг АНУ-ын Мянганы сорилын сангийн буцалтгүй тусламжийн компакт гэрээний хүрээнд хэрэгжих “Ус дахин боловсруулан дулааны станцуудын хөргөлтийн системд ашиглах төсөл”-ийн хүрээнд үйлдвэрийн технологийн хэрэгцээнд ашиглах юм. Өөрөөр хэлбэл, цэвэрлэсэн усыг ахуйн хэрэглээнд буюу дулааны станцад нийлүүлэх дэд бүтэц бий болгоно гэлээ. 

Монгол Улсын Ерөнхий сайд У.Хүрэлсэх

"Энэхүү ажил нь Нийслэлийн ард иргэдийн эрүүл аюулгүй байдлыг хангахад онцгой үүрэг гүйцэтгэнэ. Хамтран ажилласан бүх байгууллагад Монгол Улсын Засгийн газрын нэрийн өмнөөс талархаж байгаагаа илэрхийлье. 

Монгол Улсын Ерөнхий сайд болоод удаагүй байхдаа Төв цэвэрлэх байгууламж дээр ирж нөхцөл байдалтай анх танилцаж байсан. Түүний дараа БНХАУ-д айчлахдаа шинэ цэвэрлэх байгууламж барих асуудлыг шийдсэн нь өнөөдөр ийнхүү биелэлээ олж байгаад баярлаж байна. Олон том бүтээн байгуулалтууд энэ хавар эхэлж байна. Сэтгэл байвал ямар ч ажил бүтдэг юм" гэсэн юм. 

Мөн БНХАУ-аас Монгол Улсад суугаа Элчин сайд Шин Хаймин үг хэллээ. 

Барилга хот байгуулалтын сайд Х.Баделхан: 

"Хуучин цэвэрлэх байгууламжийг 1964 онд анх барьсан. Тухай бүрт нь шинэчлэл хийгдсэн боловч 2001 оноос хойш шинээр барих асуудал яригдсаар олон ЗГ дамжаад өнөөдөр шийдэгдэж байгаад маш их баяртай байна. Хүчин чадлын хувьд 250 мянган метр/куб лагийг хүлээн авах боломжтой болох юм. Ашиглалтад орсноор Улаанбаатарт өнөөдөр үнэртэж байгаа үнэр байхгүй болно. Төслийг хэрэгжүүлэхэд дэмжлэг үзүүлсэн, хамтран ажилласан Элчин сайд болон бусад холбогдох хүмүүст талархал илэрхийлье" гэсэн юм.