Хятадын сансрын хөлөг сарны цаад талын алслагдсан хэсэгт амжилттай газардсан тухай Хятадын хэвлэл мэдээллийн хэрэгслүүд өнөөдөр мэдээллээ.

Chang’e-4 станц Бээжингийн цагаар 10:26-д өмнөд туйлын Эйткений хэсэгт газарджээ. Тодруулбал, энэ нь сарны дэлхий рүү хардаггүй, судлагдаагүй байсан, нууцлаг хэсэгт очсон анхны тохиолдол болж байна.  

Энэ нь сансар огторгуйн нээлтийн хувьд түүхэн үйл явдал болсон төдийгүй Хятадын сансрын хөтөлбөрийн хувьд ч ач холбогдолтой үйл явдал болов. Өмнө нь сансрын хөлгүүд сарны алслагдсан хэсгийг зорин явж байсан ч газардаж байсан удаагүй.

Хятадын роботон сансрын станцаас сарны гадаргуугийн хамгийн анхны зургийг илгээсэн байна. Мөн тус сансрын хөлөг сарны газар нутгийг судлах, биологийн туршилт хийх багаж хэрэгслүүдийг авч явсан байна. 

“NASA”-гийн захирал Жим Бриденстин Хятадын Chang’e-4 хөлгийн багийнханд баяр хүргэсэн талаараа твиттер хуудсандаа бичсэн юм.

Хятад улс нь 2030 он гэхэд ОХУ, АНУ-ыг гүйцэж, сансар огторгуйн салбарт тэргүүлэх зорилт тавьсан байна. Тэрбээр, ирэх жил өөрсдийн сансрын станцыг барих төлөвлөгөөтэй байгаа аж. 

Эх сурвалж: BBC, Reuters