Энэ сарын 25-нд Баян-Өлгий, Говь-Алтай, Ховд, Увс аймгийн нутгаар болсон цаг агаарын гамшигт үзэгдлийн улмаас Увс аймгийн Түргэн сумын цахилгаан дамжуулах агаарын шугамын нийт 13  төмөр тулгуур багана унаж нийт 50 суманд цахилгаан тасраад байсан билээ.  

Нөхцөл байдалтай холбогдуулан “Баруун бүсийн эрчим хүчний систем” ХХК, “Цахилгаан дамжуулах үндэсний сүлжээ” ХХК-ийн ажлын хэсэг ажиллаж аймаг, сумдуудын эрчим хүчийг урьд шөнө хэвийн горимд орууллаа.

Тодруулбал, шөнийн 01:00 цагт 35 кВ-ын Сагил агаарын шугамын тулгуур дамжуулагч утас татаж дуусган 04:26 цагт ОХУ-ын Чадан Дэд Станцад С-458 агаарын шугамыг залгаж, хүчдэл өгчээ. Мөн 04:38 цагт Дөргөн Усан Цахилгаан Станцыг зэрэгцээ ажиллагаанд оруулжээ. Ингэснээр Баян-Өлгий, Увс, Ховд аймгийн бүх сум Говь-Алтай аймгийн таван сумын эрчим хүчний хэрэглээ хэвийн горимд орлоо.

Эрчим хүчний яам, “Цахилгаан дамжуулах үндэсний сүлжээ” ТӨХК, “ББЭХС” ТӨХК-ийн хамтарсан ажлын хэсэг Улаангом-Өмнөговийн 110 кВ-н шугамд есөн тулгуур унасныг сэргээн засварлах ажил 26-ны өдөр дууссан бол ОХУ-аас Улаангом хүртэлх 220 кВ-н цахилгаан дамжуулах агаарын шугамыг сэргээн босгох ажил  27-28-ны өдрүүдэд ийнхүү хийгдлээ. 

Эх сурвалж: Эрчим хүчний яам