Олон улсын зах зээлд гаргасан Монгол Улсын Засгийн газрын ам.долларын бондуудын ханш ойрын хугацаанд өсөх төлөвтэй байгаа гэж “Nomura”-ийн шинжээчид үзэж байна.

Энэ нь хөгжиж буй орнуудын талаарх зах зээлийн талаарх хүлээлт сайжирсантай холбоотой гэж дүгнэлээ. Монгол Улсын эдийн засгийн суурь хүчин зүйл харьцангуй эерэг байгаа нь бондын үнэлгээ өндөр тогтоход нөлөөлжээ. Гэхдээ үнэлгээ цаашид илүү өсөх боломжтой гэж “Nomura”-ийн шинжээч Николас Яп тэмдэглэсэн байна. Монгол Улсын Засгийн газрын зээлжих зэрэглэлийг “S&P” агентлаг "B-"-аас "B" болгож дээшлүүлсэн юм.

Зээлжих зэрэглэлийг дээшлүүлснээс хойш Монгол Улсын 2023 онд төлөх “Гэрэгэ” бондын үнэлгээ 0.6 центээр өссөн байна. Мөн Монгол Улсын Хөгжлийн банкны гурван долоо хоногийн өмнө гаргасан бондын үнэлгээ 0.6 центээр өсөж тогтжээ. Одоогоор Азийн фронтиер ангилалд хамаарах улсууд дотроос Монгол Улсын бондын үзүүлэлтүүд хамгийн эерэг байгаа гэж “Nomura” онцолсон байна.

Б.Бямбасүрэн