Харанга хамтлагийн аргил гитарчин, дуучин, продюсер, МУУГЗ Ц.Чулуунбатын “Амьдралын бэлэг” цомгийн “Эр хүн” дууны клипний нээлт Хүннү Молл худалдааны төвд арваннэгдүгээр сарын 3-ны бямба гарагт боллоо.

Нийслэлчүүдийнхээ амралтын өдөрт гэнэтийн бэлэг болж тэрээр энэхүү цоо шинэхэн клипээ олон нийтэд үзүүлсэн юм. Яруу найрагч Л.Мөнхжаргалын шүлгээр бүтсэн “Эр хүн” дууны клипийг Хүннү Молл худалдааны төв дэмжин G-Entertainment-ийн хамт олон хийж, тус студийн найруулагч н.Тэмүүлэн найруулжээ.

Тус арга хэмжээг продюсер М.Болд /Томоо/ зохион байгуулж жүжигчин Б.Ууганбаяр хөтлөн явуулсан юм.  Клипнийхээ санааг өнгөрсөн зун олсон гэнэ. Энэ талаар G-Entertainment-ын захирал Н.Ганболд “Оюу Толгойд хийсэн урлагийн тоглолтын үеэр “Харанга” хамтлагийн гитарчин Я.Одсүрэн Хөдөлмөрийн Гавьяаны Улаан Тугийн Одонгоор шагнуулсан аж. Энэ сайхан үйл явдалд зориулж тэнд байсан манай урлагийн бригадынхан бяцхан хэмжээний баяр тэмдэглэж, Чука ах 40 гаруй жил нөхөрлөж яваа найздаа зориулаад “Эр хүн” дуугаа дуулж өгчээ.

Энэ дууг сонсоод клип хийх саналыг тавьсан. Жүжигчин Б.Ууганбаяр ч клипний нээлтийг хөтөлж өгье гэж тохиролцсон юм. Ингээд энэ клип бүтэж, энэхүү арга хэмжээг зохион байгуулж байна” гэж нээлтийн үеэр ярьжээ.

Найруулагч н.Тэмүүлэн энэхүү дууг сонсоход “Эр хүний замын хүзүү урт” гэдэг үг бодогдож эр хүн урт, бартаатай замыг алдаа оноотой нь, унаж, босож туулж ирсэн гэсэн санаа төрсөн байна. Ингээд клипний зураг авалтын үеэр Ц.Чулуунбат Хар зүрхний хөх нуур орчмоор барагцаагаар 25 км  алхсан гэнэ.  Мөн зураг авалтад ашигласан ухнын толгой Чука ах хээрээс олж клипэндээ оруулж улмаар G-Entertainment-ын хоймрыг одоо чимж байгааг тус студийнхэн дуулгалаа.

Хүннү Молл худалдааны төвөөр үйлчлүүлсэн иргэд амралтын өдрөө дуутай хууртай, халуун дотно өнгөрүүлжээ.