Сүүлийн жилүүдэд байгаль орчин бидний нүдэнд дээр сүйрч байгааг хүн бүр хэлэх болов. Хэдхэн жилийн дараа цэвэр усны хомсдолд орно гэх аймшигт мэдээ сэтгэл сэрдхийлгэж, өтгөн ой хөвчийг хожуул болтол нь тайрсаар. Түүнчлэн хөрсөнд нь хүрзний мөр гаргаж зүрхлээгүй нутгийг мөнгөтэй нэг нь сэндийчиж, химийн бодисоор "бордох" нь хэрээс хэтэрсэн. Энэ нь монгол нутгийг хайрлан хамгаалах эзэн үгүй мэт сэтгэдэл төрүүлнэ. Тэгвэл манайд байгаль орчны чиглэлээр үйл ажиллагаа явуулдаг 300 гаруй төрийн бус байгууллага байдаг аж. Нэг жишээ л хэлэхэд өнгөрсөн оны байдлаар байгаль орчны салбарын төрийн албан хаагч 2753 байсан бол энэ чиглэлийн иргэний нийгмийн байгууллагуудад ажиллагсад дээрхээс гурав дахин их байжээ.

Нээлттэй нийгэм форум, Дэлхийн банк болон Байгаль орчны яамнаас хамтран зарласан тэтгэлэгт хөтөлбөрийн хүрээнд өнгөрсөн онд 935 мянган ам.долларын 62 төсөл хэрэгжүүлсэний дийлэнхийг төрийн бус байгууллагууд гүйцэтгэжээ. Энэ онд тус төслийн хүрээнд 37 төсөл шалгараад байгаа. Энэ мэтээр байгаль орчныг хамгаалахад төрийн бус байгууллагуудын үүрэг их байгаа ч үр дүн нь төдийлөн харагдахгүй байгааг иргэд шүүмжилдэг. Төсөл хэрэгжүүлэхэд бичиг цаас, болон судалгааны ажилд хөрөнгө зарцуулж, мод бут суулгах, химийн бодисын хэрэглээтэй хатуу тэмцэх зэрэг бодит ажилд анхаарлаа төдийлөн хандуулдаггүйтэй дээрх шүүмжлэл холбоотой хэмээн зарим нь ярьдаг. Харин төрийн бус байгууллагууд олон төсөл хэрэгжүүлдэг ч байгаль орчныг сүйтгэж буй үйлдлийг таслан зогсоох эрх мэдлийн хувьд хумигдмал гэдгээ нуудаггүй. Ямартай ч энэ онд Байгаль орчны яам төрийн бус байгууллагуудтай нягт хамтран ажиллахаа мэдэгдсэн. Ингэснээр дээрх байгууллагуудын ажил илүү их үр дүн авчрах болно хэмээн иргэд найдаж байна.