Долдугаар сарын 29-ний өдөр Бангладешийн Дакка хотод хурдтай явсан автобус охин, хүү хоёрыг мөргөснөөр амь насаа алдсан хэрэг гарчээ. Жолооч нь өөр автобус гүйцэн түрүүлж, зорчигч авахад анхаарал хандуулснаар ухаан санаагаа алдсан байж.

Энэ явдлын дараа өнгөрсөн долоо хоногоос эхлэн олон залуучууд нэгдэн жагсаж, замын хөдөлгөөний аюулгүй байдлыг сайжруулах арга хэмжээ авахыг засгийн газраас шаардсаар байна. Жагсагчид тээврийн хэрэгслийг зогсоож, замаар явахад тохиромжтой эсэхийг шалгаж, жолооны үнэмлэхийг ч харж байлаа.  

Харин даваа гарагт Бангладешийн засгийн газар замын хөдөлгөөний аюулгүй байдлыг сайжруулахаа амлаж, кабинет бэлтгэж байсан "Тээврийн хэрэгслийн акт"-ыг баталжээ.

Энэхүү хөдөлгөөнийг оюутан залуучууд эхлүүлэхэд цахим ертөнц чухал үүргийг гүйцэтгэсэн байна. Тэд цахим хуудсаар зохион байгуулалтын ажлыг хийж, мэдээллийг тарааж байв. Харин засгийн газар бямба гарагт 3g, 4g үйлчилгээг түр хугацаанд хаасан гэнэ.

Даваа гарагаас эхлэн цагдаа нар нулимс асгаруулагч, резинэн сум хэрэглэж жагсагчдыг гэмтээж эхэлжээ. Гэсэн ч үүнийг эрх мэдэлтнүүд хүлээн зөвшөөрөхгүй байна. Улсын эмнэлэг 40 иргэнд эмчилгээ хийж байгаа талаар The Daily Star сонинд мэдээлжээ.

18 сая хүн амтай тус хотод өнгөрсөн жил гэхэд л 4000 явган зорчигч зам тээврийн ослын улмаас амиа алдсан тоо баримт бий.   

Эх сурвалж: Business insider