-Хеликобактери нь хүнээс хүнд дамжиж халдварладаг уу?
-Хеликобактери нь хүнээс хүнд дамжин халдварладаг. Дэлхийд маш өргөн тархсан бактерийн халдвар юм. Уг бактери нь ходоодны үрэвсэл, шархлаат өвчин, ходоодны хавдрын гол үүсгэгч нь болдог.

-Ямар орчинд илүү их өсөж үрждэг вэ?
-Хеликобактери пулори нь хүчилд тэсвэртэй, мушгиа хэлбэртэй, ходоодны хүчиллэг орчинд амьдарч, өсөж үржиж чаддаг. Одоогоор мэдэгдэж байгаа цорын ганц бичил биетэн юм.

-Ходоодыг яаж гэмтээдэг вэ?
-Хелико пулорийн мушгиа хэлбэр нь ходоод, 12 хуруу гэдэсний салст бүрхэвчинд нэвтэрч салслаг давхаргыг гэмтээн өсөж үржихэд таатай нөлөө үзүүлдэг.
Судалгаагаар 1900-2000 оны хугацаанд тархалтын хувь дэлхийд 80 хувь болтлоо өссөн болох нь тогтоогдсон.

-Юунаас болж энэ өвчин газар авч тархаад байна вэ?
-Тархалт нь тухайн улс орны нийгэм эдийн засгийн байдал, хүмүүсийн амьдралын нөхцөл, эрүүл ахуйн мэдлэг, дадлаас их шалтгаалж байна. Орчин үед эмчилгээний сонгомол аргууд нэвтэрснээр эмчилгээний үр дүн 95 хувь болтол нэмэгдэж байна.

-Хэрэв хеликобактеритэй гэж оношлогдсон бол ямар арга хэмжээг даруй авах вэ?
-Хэрэв хеликобактеритэй гэж оношлогдсон бол дараах зүйлийг анхаарах хэрэгтэй. Үүнд:
* Эмчилгээний дэглэмийг баримталж эмчийн заавраар эмчилгээг хийх
* Эмчилгээний үр дүнгхянах шинжилгээг хугацаанд нь өгөх, зургаан долоо хоногийн дараа мөн эмчилгээнээс хойш гурван сарын дараа хяналтын шинжилгээг өгөх хэрэгтэй.

-Хеликобактерийн халдвартай өвчтөнөөс гэр бүлийнх нь хүмүүс халддаг уу?
-Хеликобактерийн халдвартай өвчтөний гэр бүлийн хүмүүс хеликобактери илрүүлэх шинжилгээнд хамрагдах хэрэгтэй. Яагаад гэвэл тэдний амьдралын орчин, нөхцөл нь халдвар тархах өндөр магадлалтай байдаг. Тийм учраас эмчилгээний явцад үрэвслийн эсрэг стеройд болон стеройд бус эмийг хэрэглэхгүй байх хэрэгтэй. Төмөр дутагдлын цус багадалттай бол төмөр нөхөх эмийг хэрэглэж, эрүүл мэндийн мэдлэгээ сайжруулж, эрүүл ахуйн ариун цэврийн зөв дадалд үр хүүхдээ сургаарай.

-Хүндрэхээрээ ямар байдалд хүргэдэг вэ?
* Ходоод гэдэсний цус алдалт
* Төмөр дутагдлын цус багадал
* Хавдарт шилжих
* Ходоодны гарах хэсгийн нарийсал
* Ходоод 12 хуруу гэдэс цоорох хүндрэлүүд гарна.

-Өвчтөний эмчилгээ үр дүнгүй байвал...
-Эмчилгээ үр дүнгүй байх нь өвчтөн эмчилгээний дэглэмийг мөрдөөгүй эсвэл бактери устгах эмчилгээнд дасал болсон байх зэргээс шалтгаална.

Чингэлтэй Дүүргийн Эрүүл мэндийн Нэгдлийн дотрын эмч Н.Цолмон, Б.Тунгалаг