Засгийн газрын хуралдаанаар долоон аймгийг хамруулсан, газар тариалангийн бүсийн хил хязгаарыг нарийвчлан зарласан. Ингэснээр Дархан-Уул, Төв, Сэлэнгэ аймгийн зарим сумдад бэлчээрийн мал аж ахуй эрхлэх боломжгүй болсон юм.

Иймд Засгийн газар тариалангийн бүсэд эрчимжсэн мал аж ахуй эрхлэх, малын үүлдэр угсааг сайжруулахад дэмжлэг үзүүлэх боломжийг судалж байна. Сүүний болон махны хэвийн үхэр өсгөх, фермерийн аж ахуй байгуулахад дэмжинэ гэж ХХААХҮЯ-наас мэдээллээ.

Тариалангийн тухай хуулиар тариалангийн талбай дотор барьсан өвөлжөө, хаваржааг тухайн сум орон нутаг дотор нүүлгэхэд гарах тээврийн нэг удаагийн зардлыг тариалангийн аж ахуйн нэгж хариуцдаг. Мөн энэ хуулиар  тариалангийн талбайн захаас гадагш 500 метрийн зайд мал бэлчээх, оторлох болон бэлчээрийн мал аж ахуйн өвөлжөө, хаваржаа, зуслан, намаржаа байхыг хориглодог.

Нүүн шилжих мал аж ахуй эрхлэгчийн өвөлжөө, хаваржааны газрыг сум, дүүргийн Засаг дарга 30 хоногийн дотор шийдвэрлэнэ гэж заажээ. Хуулийн эдгээр заалтыг зөрчвөл зөрчлийн хуулийн дагуу хариуцлага хүлээдэг байна.

Газар тариалангийн бүс нутгийг зарласнаар Үндсэн хуулийн тодорхой заалтыг зөрчсөн гэж зарим хүн үзсэн юм. Тухайлбал 16-р зүйлийн 18-д заасанчлан иргэдийн амьдрах газраа өөрөө сонгох эрхийг зөрчсөн гэсэн юм.

Харин ХХААХҮЯ-наас “Тариалангийн бүс нутаг, бэлчээрийн мал аж ахуй болон эрчимжсэн мал аж ахуй зэрэг нь үйлдвэрлэлийн хэрэгсэл бөгөөд төрөөс үйлдвэрлэлийн хэрэгслийн байршлыг зааснаас малчдын амьдрах газрыг заагаагүй. Тиймээс тариаланчид тариалангийн бүс нутаг болох талбайгаа дагаж, малчид бэлчээрийн болон эрчимжсэн мал аж ахуйгаа дагаж амьдрах зүй тогтол үйлчилж байна гэж ойлгох хэрэгтэй” гэж тайлбарлав.