Нийслэлд үйл ажиллагаа явуулж байгаа томоохон дөрвөн усан сан, чийрэгжүүлэх усан сангаас нянгийн бохирдол илэрчээ.

Нийслэлийн Мэргэжлийн хяналтын газар 2018 оны төлөвлөгөөт ажлын дагуу Улаанбаатар хотод үйл ажиллагаа явуулж байгаа 35 халуун ус, саун, бассейны газарт хяналт, шалгалт болон лаборторийн шинжилгээ хийжээ. Шалгалтанд хамрагдсан 10 бассейн, усан сангийн дөрөвт нянгийн бохирдол илэрсэн байна.

“Нарантуул шейл ойл” ХХК-ны буюу SS Club-ын болон Халиун төгөл ХХК-ийн усан бассейнуудад үлдэгдэл хлор бага гарсан нь дээрх газруудын ариун цэвэр, халдвар хамгаалалтын дэглэм хангалтгүй, усан сангийн усыг байнгын эргэлтэд байлгах шахуурга, шүүлтүүр, халдваргүйжүүлэлтийн тоног төхөөрөмжүүд нь шаардлага хангахгүй байгаатай холбоотой ажээ.

Улаанбаатар хотод үйл ажиллагаа явуулж байгаа нийт усан бассейнуудын 70 хувь нь дэргэдээ лабораторигүй байдгаас дээрх зөрчлүүд гардаг байна.

Мөн шалгалтанд нийслэлд үйл ажиллагаа явуулдаг 83 саунаас Говь, Dream, Маргад, Нарантуул, Улаанбаатар, Дөлгөөн нуур зочид буудлуудын саун зэрэг 15 газрыг хамруулжээ. 

“Илэрсэн зөрчлийн тухайд дээрх саунууд ихэнхдээ батлагдсан зураг төслийн дагуу баригдаагүй, суурин давхарын хийцийг нь өөрчилсөн барилгад үйл ажиллагаа явуулснаас, агааржуулалт муу, чийгшил ихтэй байдаг.

Энэ нь тухайн барилгын насжилтанд сөргөөр нөлөөлж байна” гэж нийслэлийн Мэргэжлийн хяналтын газрын дарга Л.Эрдэнэчулуун хэлсэн юм.

Тэрээр “Шалгалтаар зөрчилтэй гарсан ААН-үүдэд шаардлага, албан даалгавар хүргүүлэн, биелэлтэнд хяналт тавьж, 12 ААН, хоёр иргэнд нийт 5.5 сая төгрөг ноогдуулан ажиллаж байна” гэж сэтгүүлчдэд зарласан хэвлэлийн хурлын үеэр мэдэгдлээ.

С.Түвшинжаргал