Мобиком Корпораци нийгмийн хариуцлагынхаа хүрээнд “Нэг баг-Нэг гэр бүл” уриан дор өөрсдийн тарьсан моддыг усалж тордон “Гэр бүлийн өдөр”-ийг өнгөрөгч Бямба гарагт Үндэсний цэцэрлэгт хүрээлэнд тэмдэглэн өнгөрүүллээ. 

Тэд тус газар гурван жилийн өмнө “Моби төгөл” буюу 1000 модыг анх тарьсан бөгөөд жил бүр хамт олноороо хүрэлцэн ирж тарьсан модоо арчилж тордон, нэг өдрийг гэр бүлээрээ үр бүтээлтэй өнгөрүүлдэг аж. Тус төгөл нь Улаанбаатар хотын ундны усны эх ундарга дээр байрласан учир ундны усны нөөцөд эерэгээр нөлөөлж, түүнийг хамгаалж байгаа аж. 

Үйл ажиллагааг нээж Мобиком Корпорацийн Ерөнхий захирал Тацуяа Хамада хэлэхдээ “Монголын үүрэн харилцаа холбоо, мэдээлэл технологийн тэргүүлэгч компанийн хувьд нийгмийн хариуцлагыг чухалчлах нь бидний нэг үүрэг билээ. Бид олон төрлийн нийгмийн ажлуудыг санаачлан хэрэгжүүлдэг. Түүний нэг бол өнөөдрийн бидний хийж буй “Моби Төгөл” үйл ажиллагаа юм. Энэхүү төслийн гол зорилго нь Улаанбаатарын агаарын бохирдлыг бууруулах, хотын ундны усны эх ундаргад дэмжлэг болох юм. Мөн бид ирж буй жилүүдэд энэ төрлийн төсөл, ажлуудыг санаачлан хэрэгжүүлсээр байх болно” хэмээсэн юм. 

Тэд өөрсдийн тарьсан моддын ойр орчим дахь хог, хогийн ургамлыг цэвэрлэн, усалгаа хийсэн юм. Түүний дараагаар "Маамуу" хүүхэлдэйн киноны Аами, Таами жүжигчилсэн тоглолт болж, зураачид хүүхдүүдийн нүүрэн дээр зураг зуран, хөгжилтэй тэмцээн уралдаан зохион байгуулж нэг өдрийг хамт олноороо мартагдахааргүй өнгөрүүллээ.