ОХУ-ын Ерөнхийлөгч В.Путин өчигдөр дөрөв дэх удаа Ерөнхийлөгчийн тангараг өргөлөө. 

Тангараг өргөх ёслолд Засгийн газрын элч төлөөлөгчид, урлаг соёлын зүтгэлтнүүдээс гадна Ерөнхийлөгчийн сонгуулийн үеэр ажилласан сайн дурын ажилчид, нийгэмлэг хөдөлгөөний гишүүд зэргийг урьснаараа энэ удаагийн ёслол онцлогтой болсон байна.

Тангараг өргөх ёслолын ажиллагаа Кремлийн гурван танхимд зэрэг болжээ. Энэ удаад Ерөнхийлөгчийн цуваа байхгүй. Өмнө нь Ерөнхийлөгч Холбооны аюулгүйн албаны хамгаалалт дор Кремльд автомашины цуваагаар хүрэлцэн ирсэн аж.

В.Путин Кремлийн I корпуст байрлах ажлын өрөөнөөсөө Тангараг өргөх ёслол болох танхим руу алхаж, дараа нь автомашинаар хүрсэн юм. Тэрээр Георгиевский, Александровский болон Андреевскийн танхимаар дамжин, тангараг өргөх ёслолын танхимд ирж, Ерөнхийлөгчийн тангаргаа өргөжээ.

ОХУ-ын Ерөнхийлөгч Владимир Путин тангараг өргөх ёслолын үеэр сонгуулиар түүний төлөө санал өгч дэмжсэн иргэддээ талархаж буйгаа илэрхийллээ. “ Эв нэгдэлтэй байж чадсан, надад итгэл хүлээлгэсэн Оросын ард иргэддээ чин сэтгэлээсээ талархаж байна. Дахин баярлалаа гэж хэлмээр байна. Сонгуулиар намайг дэмжсэн ОХУ-ын иргэддээ баярлалаа. Та бүхний дэмжлэг Орос улс хүчирхэг болж, ард иргэд сайхан амьдарна гэсэн итгэл найдварыг төрүүлж байна.” хэмээн тэрээр онцолсон байна. В.Путин түүний амьдралын гол зорилго бол ард иргэд болон эх орныхоо төлөө ажиллах хэмээн ирэх 6 жил улсаа удирдах болсон нь маш том хариуцлага болохыг мэдэрч байгаагаа дурджээ.

Тэрээр засгийн газар шаргуу ажиллаж, цаг үетэйгээ алхаж, тэргүүлэгч байх ёстой хэмээн онцолсон юм.