Төв аймгийн Эрдэнэсант сумын харъяат Монгол Улсын гавьяат тамирчин, Хөдөлмөрийн баатар, Үндэсний бөхийн дархан аварга, Олимпийн мөнгөн медальт Жигжидийн Мөнхбат  77 насандаа өвчний улмаас таалал төгсчээ.

Монголын ард түмний хайр хүндэтгэлийг хүлээсэн дархан аварга Ж.Мөнхбат үндэсний бөх болон чөлөөт бөхийн төрлөөр тив дэлхийд гарамгай амжилт үзүүлсэн тамирчин юм.

Тухайлбал тэрээр Монгол Улсын чөлөөт бөхийн тамирчдаас олимп, ДАШТ-ий анхны медалийг эх орондоо авчирчээ.

Ж.Мөнхбат 1967 онд Энэтхэг улсын Шинэ Дели хотноо болсон чөлөөт бөхийн ДАШТ-ээс хүрэл медаль хүртсэн бол дараа жил нь Мексикийн Мехико хотод зохиогдсон зуны олимпын наадмаас мөнгөн медаль хүртэж байв.

Тэрээр үндэсний их баяр наадамд 1963-1967, 1974 онуудад зургаан удаа түрүүлсэн билээ.

Түүний хүү Хакүхо М.Даваажаргал Японы мэргэжлийн сүмод томоохон амжилт гаргаж, ёкозүна цол хүртсэн 69 дэх их аварга болж байлаа.

Дархан аварга Ж.Мөнхбатын ар гэр, төрөл төрөгсдөд гүн эмгэнэл илэрхийлье.