Эмчийн үзлэг, зөвлөгөө, сувилахуйн тусламж, үйлчилгээ, цус, шээс, өтгөний шинжилгээ, булчин, судас тариа, зүрхний бичлэг зэргээс эхлээд биед байх төрөл бүрийн гуурсны асаргаа, сувилгаа зэргийг гэрийн нөхцөлд найдвартай, туршлагатай эмч, сувилагч нараар хийлгэх боломжтой болжээ.

Улаанбаатар Сонгдо эмнэлгээс нэгэн шинэ үйлчилгээг нэвтрүүлсэн нь “Гэрээр үзүүлэх эмнэлгийн тусламж үйлчилгээ” юм.

Энэ нь эмнэлгийн тусламж үйлчилгээг гэрээр авах шаардлага, хүсэлтэй болон цаг заваа хэмнэн шинжилгээ өгөхийг хүссэн хүн бүрт зориулсан үйлчилгээ юм.

Тус эмнэлгийн хамт олон 2017 оны аравдугаар сараас эхлэн туршилтаар уг үйлчилгээг эхлүүлсэн бөгөөд хоёрдугаар сараас эхлэн албан ёсоор үйлчилгээндээ нэвтрүүлээд байна.

Үйлчлүүлэгчид нийт 18 төрлийн үйлчилгээг гэрээр авах боломжтой бөгөөд үйлчилгээг тус эмнэлгийн үндсэн ажилтнууд үзүүлэх нь онцлог.

Шинээр нэвтрүүлээд буй “Гэрийн тусламж үйлчилгээ”-ний талаар УБ Сонгдо Эмнэлгийн Сувилахуйн албаны дарга А.Мөнхтуяагаас тодрууллаа.

-Шинэ үйлчилгээг нэвтрүүлэх нөхцөл, шаардлага нь юу байв?
-Эмнэлгийн тусламж, үйлчилгээг эмнэлэг дээр авах боломжгүй, өөрийн гэр орчиндоо авах шаардлага эсвэл хүсэл сонирхолтой үйлчлүүлэгчид эрүүл мэндийн тусламж үйлчилгээг найдвартай, туршлагатай эмнэлгийн ажилтан үзүүлэх шаардлагатай байна гэж бид үзсэн. Учир нь мэс засалд орох, бэртэл авах, эмнэлэгт хэвтэж эмчлүүлээд бүрэн эдгээгүй ч цаашид хийгдэх эмчилгээ, үйлчилгээг гэрээр авах шаардлага гардаг. Зарим тохиолдолд хэвтрийн хүнд өвчтөн, эсвэл өндөр настанг гэрээр асрах, сувилгаа хийх хэрэгцээ гардаг. Манай эмнэлгээр үйлчлүүлсэн эмчлүүлэгч, үйлчлүүлэгч нараас ийм үйлчилгээг авах хүсэлтийг нэлээд тавьсан учраас бид энэ тал дээр ажиллаж, нэвтрүүлэхээр болсон. 

Одоогийн байдлаар нийт 18 төрлийн тусламж үйлчилгээг үзүүлнэ

Манай эмнэлэг өнгөрсөн арван жилийн хугацаанд хөдөө орон нутгаас өвчтөн зөөвөрлөх, онгоцны буудлаас өвчтөн тосож эмнэлэгтээ хүлээн авах, манай эмнэлгээр үйлчлүүлж байсан үйлчлүүлэгчид гэрээр нь очиж зарим төрлийн эрүүл мэндийн тусламж үйлчилгээг үзүүлэх зэрэг яг үйлчилгээ болгож гаргаагүй ч туршлага бол бий. Үүн дээрээ үндэслээд биеэ даасан үйлчилгээ болгон гаргаж байгаа юм.

-Нийт хичнээн төрлийн үйлчилгээг иргэд гэрийн нөхцөлд авах боломжтой вэ?
-Манай эмнэлэг 2017 оноос эхлэн энэ үйлчилгээг судалж эхэлсэн. Өнгөрсөн оны аравдугаар сараас эхлээд туршилтаар үйлчилгээгээ үзүүлж байсан бол энэ сараас эхлэн үйлчилгээ маань жигдрээд байна. Одоогийн байдлаар нийт 18 төрлийн тусламж үйлчилгээг үзүүлнэ. Гэхдээ яг гэрт нь очиход тухайн үйлчлүүлэгчийн биеийн нөхцөл, байдлаас хамаараад тусгагдаагүй эсвэл яаралтай гэх мэт тусламж үйлчилгээ үзүүлэх шаардлага үүсэх боломжтой. Одоо үзүүлж буй 18 төрлийн үйлчилгээнд:

1.Эмчийн үзлэг, зөвлөгөө
2.Сувилахуйн тусламж үйлчилгээ, зөвлөгөө
3.Эмчилгээ, шинжилгээний зохицуулалт хийх
4.Сорьц шинжилгээ авах

• Цусны шинжилгээ
• Шээсний шинжилгээ
• Цэрний шинжилгээ
• Хоолойн арчдасын шинжилгээ
• Өтгөний шинжилгээ
• Бүдүүн гэдэсний дурангийн шинжилгээнд бэлтгэх, заавар өгөх

5.Булчин/арьсан дор, арьсан дотор тарилга хийх
6.Судас тарилга хийх
7.Дусал тарилга хийх
8.Зүрхний цахилгаан бичлэг хийх
9.24 цагийн зүрхний бичлэг хийх
10.24 цагийн даралтны бичлэг
11.Төв болон порт IV боолт солих, сувилгаа
12.Утлага хийх
13.Энгийн боолт хийх
14.Идээт үрэвслийн боолт хийх
15.Хэвлийн хөндийн төрөл бүрийн гуурснуудын асаргаа,
16.Бургуй болон лаа тавих
17.Шээлгүүр тавих, авах, асаргаа, сувилгаа
18.Бумба тавих зэрэг болно.

Гэрийн нөхцөлд хийх боломжгүй шинжилгээг авахын тулд өвчтөнийг эмнэлэг рүү зөөвөрлөх үйлчилгээг буюу эмчилгээ, шинжилгээний зохицуулалт хийж байна.

Мөн хүнд өвчтөнийг гэрээр асрах үйлчилгээ байгаа бөгөөд тухайн үйлчилгээг эмчлүүлэгчийн ар гэрийнхэнтэй нь гэрээ байгуулсны үндсэн дээр хийх бөгөөд 24 цагаар ч асаргаа, сувилгааг авах боломжтой.

-Үйлчилгээний давуу талыг юу гэж харж байна вэ?
-Иргэд эмнэлэгт ирэх цаг болон эдийн засгийн талууд дээр хэмнэлт хийх боломжтой болж байна. Хувь хүмүүс, хувийн эмнэлгүүд гэрээр тусламж үйлчилгээг их үзүүлдэг болсон байна лээ. Харин манай үйлчилгээний хувьд гурав дахь шатлалын хувийн том эмнэлэг дээр суурилсан, 10 жилийн туршлагатай үндсэн ажилтнуудаас бүрдсэн багаар үйлчилгээ үзүүлэх учраас туршлагаар илүү давуу талтай байх болов уу гэж харж байна.

Гэрийн нөхцөлд хийх боломжгүй шинжилгээг авахын тулд өвчтөнийг эмнэлэг рүү зөөвөрлөх үйлчилгээг буюу эмчилгээ, шинжилгээний зохицуулалт хийж байна

Эмнэлгийн бүх ажилчид нэг баг болж ажиллахаас гадна манай эмнэлэгт урьд нь үйлчлүүлж байсан бол үйлчлүүлэгчийн шинжилгээ, эмчилгээний мэдээллээ цахим хэлбэрээр авах ба боломжтой ба тусламж, үйлчилгээг цогцоор нь шийдэх боломжтой гэж бид харж байна.

Бусад гадны орнуудад “Гэрийн тусламж үйлчилгээ” гэдэг нь маш том баг ажиллаж байдаг. Хүмүүс зөвхөн асаргаа үзүүлж байгаа юм чинь сувилагчийн ажил гэж боддог. Гэтэл эмч, сувилагч, сэтгэлзүйч, хоолзүйч гээд бүтэн баг ажиллах ёстой. Тиймээс бид эмнэлгийн мэргэжилтнүүдтэй хамтраад багаар үйлчилгээ үзүүлж байна. Эмчийн үзлэг, зөвлөгөө гэхэд л нарийн мэргэжлийн эмч нь очоод зөвлөгөө өгөх юм. Баг гэхээр нэг төрлийн нарийн мэргэжлийн эмч, 2-3 сувилагч байна гэж ойлгоод байдаг. Тиймээс бид өөрсдийн бүх төрлийн нарийн мэргэжлийн эмч нарыг энэ үйлчилгээндээ хамруулж байгаагаараа онцлог, давуу талтай.

-Хамрах хүрээ нь ямар байх вэ. Зөвхөн нийслэлийн төвийн дүүргүүдэд үзүүлэх үү эсвэл зуслангийн бүсэд ч хүрэх юм уу?
-Үзүүлнэ. Хот дотор эмнэлгээс 5 км дотор нэг тарифтай. Харин үүнээс хол бол км тус бүрээр үнэ нь өөрчлөгдөнө.

-Шинжилгээний тухайд зөвхөн гэрээр авах уу эсвэл албан байгууллага ч гэдэг юм уу өөр газруудад үйлчилгээ үзүүлэх боломжтой юу?
-Эмнэлгийн бус орчин буюу гэр эсвэл ажлын байр гээд хаана ч үйлчилгээг үзүүлж болно. Бид эхлээд и-мэйл болон утсаар үйлчилгээний нөхцөлөө танилцуулна. Мөн эргээд нөгөө талаас ямар орчинд ямар үйлчилгээ авах гэж байгаа талаар нь тодруулах юм. Удаан хугацаанд, олон удаагийн тусламж, үйлчилгээ авах гэж байгаа бол бид эхний ээлжинд гэрээ хийж, ямар орчинд, хэдэн цагаар, ямар төрлийн тусламж үйлчилгээ үзүүлэх үү гэдгээ хамтран тохиролцож, хуваарь гаргана.  

Бид яаралтай дуудлагыг хүлээн авахгүй. Яаралтай тусламж, үйлчилгээг ард иргэд 103-тай холбогдож авах хэрэгтэй. Өөрөөр хэлбэл захиалгат үйлчилгээг үзүүлнэ. Эхний ээлжинд бидэнтэй холбогдож, цаг болон үйлчилгээний нөхцлөө тохирсны үндсэн дээр бид очих юм. Үндсэн ажилтнууд маань гэрээр үзүүлэх тусламжийн үйлчилгээг үзүүлэх учраас хамгийн багадаа 1-2 цагийн өмнө захиалгаа өгсөн байх хэрэгтэй.

Бид үйлчлүүлэгч болон ажилчдынхаа аюулгүй байдал дээр анхаарч ажиллаж байна. Тайланд улсын Бумрунград эмнэлгээс ирсэн мэргэжилтэн маань мөн энэ тал дээр бид нарт зөвлөгөө, заавар өгч хамтран ажиллаж байна.  

Гадны орнуудад гэрийн тусламж үйлчилгээг тусдаа эмнэлгийн хэмжээний байгууллага ажиллаж тусламж, үйлчилгээг үзүүлэх нь элбэг. Манайд одоогоор тусдаа эмнэлэг болоогүй ч бид цаашид үйлчилгээгээ үзүүлж, туршлага хуримтлуулсны үндсэн дээр энэ тал дээр ажиллана гэсэн төлөвлөгөөтэй байна.

Та гэрийн тусламж үйлчилгээний талаар дэлгэрэнгүй мэдээллийг 75752727 дугаарын утсаар УБ Сонгдо эмнэлгийн Сувилахуйн албанаас авах боломжтой.