Сассексийн гүн, ханхүү Харри “Би гэр бүлтэйгээ эвлэрэх хүсэлтэй байна. Аав маань хэр удаан амьдрахыг мэдэхгүй шүү дээ” гэж АНУ-ын Калифорни муж дахь ВВС-гийн сэтгүүлчид өгсөн ярилцлагадаа хэлжээ.  

Тэрээр Гуравдугаар Чарльз хааны бага хүү бөгөөд Их Британиас өөрт нь олгосон, аюулгүй байдлын протоколтой холбоотойгоор шүүхэд маргаан үүсгэжээ. Гэвч шүүх түүний хүсэлтийг хүлээн аваагүй байна.  

Тэрээр шүүхийн шийдвэрийн дараа ярилцлага өгч, “Аав маань надтай ярьдаггүй. Би дахин маргаан хүсэхгүй байна. Бидний хооронд үл ойлголцол үүссэн ч би тэднийг уучилсан. Маргааныг үргэлжлүүлэх нь утгагүй, амьдрал үнэ цэнтэй” гэжээ.
 
Хаан Чарльз одоо 76 настай бөгөөд өнгөрсөн онд хавдрын эмчилгээ хийлгэсэн юм.

Ханхүү Харри эхнэрийн хамт 2020 оны нэгдүгээр сард хааны гэр бүлийн гишүүн байхаас татгалзсан. Их Британийн хуульд зааснаар түүний гэр бүлийг английн цагдаа нар хамгаалахгүй, аюулгүй байдлыг нь хангахгүй. Энэ нь гэр бүлд нь эрсдэлтэй гэж үзсэн ханхүү Харри шүүхэд хандсан ч баасан гарагт шүүхийн шийдвэр гарчээ. 

Ингэснээр эхнэр хүүхдүүдээ Их Британид авчрах орчин бүрдэхгүй гэж ханхүү Харри эмээж байгаа аж. Тэрээр шүүхийн шийдвэрт урам нь хугарсан гээд үүнд ордны захиргааны ажлын хуучин арга барил нөлөөлсөн, энэ маргаанд би аавыг оролцоосой гэж хүсээгүй, ажилтнууд нь шийдэг гэж бодсон. Би эх орондоо маш их хайртай. Хүүхдүүдэдээ Их Британийг үзүүлж чадахгүй байгаа нь маш харамсалтай гэжээ.  

Тэрээр Дээд шүүхэд хандах эрхтэй ч шүүхээс эерэг шийдвэр хүлээхгүй байгаа тул   дахин шүүхэд нэхэмжлэл гаргахгүй гэсэн байна.   

Ханхүү Харри цаашид Их Британид хааны гэр бүлийн урилгаар ирсэн тохиолдолд л цагдаа нар түүний, гэр бүлийнх нь аюулгүй байдлыг хамгаалах юм байна.   

Эх сурвалж: BBC