2010 онд 17 настай байхдаа тахиа болон өндөг хулгайлаад цаазын ял аван хоригдож байсан Нигери эрд өршөөл үзүүлэхээр болжээ.

Тодруулбал Нигери улсын баруун өмнөд Осун мужийн захирагч цаазаар авах ялтай түүнд өршөөл үзүүлэхээ амлажээ.   

Тэр 2025 оны эхээр суллагдах төлөвтэй байна.  

Сегун Оловуокере хулгайн гэмт хэргийн хамтрагч Моракиньо Сандийн хамт баривчлагджээ.  Тэд хуучин модон буу, сэлэм ашиглан цагдаагийн ажилтны гэрт болон бусад айл руу халдаж, зөвхөн шувууны аж ахуйгаас л хулгай хийжээ.

2014 онд Осун мужийн дээд шүүхийн шүүгч тэднийг цагдаагийн ажилтны гэрийг хүчээр эвдэн орж эд зүйлсийг нь хулгайлсан гэж үзээд дүүжлэн цаазлах ял оноожээ.  Гэвч энэ шийтгэл олон хүний дургүйцлийг төрүүлж, тухайн үед Нигери даяар шуугиан тарьсан юм.  

Хоёр залууг удалгүй Лагос муж дахь өөр шоронгийн цаазаар авах ялын хорих тасагт шилжүүлжээ.  

Мягмар гарагт Осун мужийн захирагч Адемола Аделеке мэдэгдэл хийж, Оловуокерег өршөөхийг Хууль зүйн сайдад даалгасан байна.  

Түүнтэй хамт шүүгдсэн, гэмт хэргийн хамтрагч Моракиньо Сандид харин өршөөл үзүүлэх талаар дурдаагүй байна.  

Оловуокерегийн эцэг эх, хүний эрхийн байгууллагууд, ард иргэд олон жилийн турш түүнийг суллуулахаар тэмцэж байв.  Түүний эцэг эх саяхан нэгэн нэвтрүүлэгт оролцож, цорын ганц хүүхдэдээ өршөөл үзүүлэхийг нулимс унаган гуйсан юм.  Тэр 2025 оны эхээр суллагдах төлөвтэй байна.  

Нигери улс 2012 оноос хойш цаазаар авах ялыг гүйцэтгээгүй одоогоор 3,400 гаруй цаазын ялтай хоригдол байгаа ажээ.

Эх сурвалж: BBC