Өнгөрөгч долоо хоногт болсон МҮЭ-ийн холбооны ээлжит XXII Их хурлаар Эрүүл мэндийн даатгалын сангийн бие даасан асуудлын талаар хэлэлцжээ. Уг хурлаар Эрүүл мэндийн даатгалын санг Эрүүл мэндийн яаманд шилжүүлэх нь зүйтэй гэж үзжээ.

Энэ талаараа тус холбооны ерөнхийлөгч Х.Амгаланбаатар өнөөдөр сэтгүүлчдэд мэдээлэв. Тэрбээр "Санг яаманд шилжүүлэх асуудал өчнөөн яригдсан ч өнөөдрийг хүртэл шийдэгдээгүй байна. Эрүүл мэндийн даатгалын үндэсний зөвлөл гэх байгууллага байдаг ч ойрд хуралдсангүй. Зөвлөлийг хуралдуулж ЭМДС-гийн хөрөнгийн асуудлыг цэгцэлмээр байна" гэв. 

“Эрүүл мэндийн даатгалын сангийн хөрөнгө бол засгийн газрын хөрөнгө бус иргэдийн мөнгө. Тиймээс тэдний эмчилгээндээ зарцуулах ёстой мөнгийг эрүүл мэндийн байгууллагууд ажилчдын цалин, байгууллагын урсгал засварт ашиглах ёсгүй. Тус сан яамны харьяалалд бус бие даасан байдалд байснаар даатгалын тогтолцоог дампууруулахад хүргэж байна” хэмээн МҮЭ-ийн холбооны ерөнхийлөгч Х.Амгаланбаатар ярилаа. 

Иймд энэ асуудалд УИХ, Засгийн газар, холбогдох байгууллагад анхаарал хандуулж, Эрүүл мэндийн даатгалын үндэсний зөвлөлийг хуралдуулахыг МҮЭ-ийн холбооноос шаардлаа.