“Монгол Шуудан” ХК дэлхийн дэвшилтэт технологид суурилсан, чанартай, цогц үйлчилгээг хэрэглэгч бүрт хүргэх зорилгын хүрээнд орчин үеийн үйлчилгээний стандарт шаардлагад нийцсэн шуудангийн үйлчилгээний жишиг салбараа нээлээ. Жишиг салбарын нээлтийн арга хэмжээнд “Монгол Шуудан” ХК-ын ТУЗ-ийн дарга Д.Нарангэрэл, ТУЗ-ын гишүүн Ч.Эрдэнэчимэг, С.Мөнгөнцэцэг, “Монгол Шуудан” ХК-ийн Гүйцэтгэх Захирал Б.Анхбаатар нар болон албаны бусад хүмүүс оролцлоо.

Энэхүү жишиг салбар нь шуудангийн тохижилт үйлчилгээний стандартын дагуу шинэ өнгө төрхийг бүрдүүлэн, иргэд, байгууллагыг ая тухтай орчинд үйлчлүүлэх боломжоор хангасан, хэрэглэгч төвтэй шинэ цагийн шуудангийн анхны салбар болж байгаагаараа онцлог юм.

“Монгол Шуудан” ХК нь хэрэглэгчдийн хэрэгцээ шаардлагад нийцсэн найдвартай, хямд, хурдан шуурхай шуудангийн үйлчилгээг үзүүлэхээс гадна бичиг хэрэг, бэлэг дурсгалын “Пост Шоп”  сүлжээ дэлгүүрийг орон даяар байгуулахаар ажиллаж байна.

Мөн компанийн нийт хэрэглэгчдэдээ хүрч ажиллахын тулд үйлчилгээний чанар, хүртээмж, салбарын тохижилтыг сайжруулахад анхаарч, тохижилт үйлчилгээний стандарт болон харилцаа үйлчилгээний стандарт боловсруулан, ШҮГ болон салбаруудын үйлчилгээний ажилтнуудыг тогтмол сургалтанд хамруулан амжилтын төлөө хамтдаа тэмүүлж байна.