Ард түмний амьдрал бооцоонд тавьдаг мөрий биш гэж УИХ-ын гишүүн, ЗГХЭГ-ын дарга Э.Учрал өөрийн албан ёсны цахим хуудсандаа нийтэлжээ.

Тодруулбал, Цахим мөрийтэй тоглоомд мөнгөө алдсан нь хувь хүний өөрийн сонголт гээд хаяж болно. Гэсэн хэдий ч үүнээс болж ямар их хор хөнөөл учраад байгааг талаар товч мэдээлэл хүргэе гэв.

• Цахим мөрийтэй, бооцоот тоглоомд хэт их мөнгө алдсанаас болж өр зээлд орж, санхүүгийн хямралд орж байна.
• Цахим мөрийтэй, бооцоот тоглоомд донтогчид ихсэж хууль бусаар мөнгө олох, луйвар, хулгай, залилан хийх явдал ихэссэн.
• Цахим мөрийтэй, бооцоот тоглоомд донтсон хүмүүсийн дунд стресс, сэтгэл гутрал, амиа хорлолт ихсэж байна. Хайртай бүхнээсээ хагацан, гэр бүлүүд зовлонд унаж байна.
• Жил бүр гадагш хяналтгүй гарч буй 500 сая долларыг улсын эдийн засагт, хүн бүрийн ажил, амьдралд маш том сөрөг нөлөө үзүүлээд байна.
• Ард иргэдийн дунд ажил хийж орлого олох бус амар, хялбар аргаар мөнгө олох явдал ихсэж ажиллах хүчний бүтээмж буурав.

Цахим мөрийтэй, бооцоот тоглоом түмэн олны аз жаргал, босгосон амьдралыг сүйрүүлж байгааг Төр, Засаг зүгээр хараад суух нь утгагүй.

Тийм учраас холбогдох хуулийн төслийг УИХ-ын дарга Д.Амарбаясгаланд өргөн мэдүүлж нэн яаралтай горимоор хэлэлцүүлж өгөхийг хүссэн.

Хууль батлагдсанаар манай улсад цахим мөрийтэй тоглоомын платформууд хориглогдож, зар сурталчилгаа, агентуудын үйл ажиллагаа бүрмөсөн зогсоно.

Үүнийг дагаад тоглох залуусын тоо 65% хувиар буурч, гадагш хяналтгүй гарч буй 500 сая долларт санхүү, хуулийн байгууллагаас хяналт тавих боломж бүрдэх юм.

Энэ бүхний цаана ард түмний нулимс, зовлонгоор ашиг сонирхол нь хөндөгдсөн олон хүмүүс бухимдаж байгаа нь тодорхой.
Иргэн бүрийг энэ хуулийн төслийг дэмжиж, хамтран ажиллахыг хүсье гэв.