Бенгалийн булангийн алслагдсан арал руу аялж, дэлхийн хамгийн тусгаарлагдсан омгуудын нэгтэй холбоо тогтоохыг оролдсон АНУ-ын нэгэн жуулчныг баривчилжээ.  

24 настай эрэгтэй жуулчин Михаило гуравдугаар сарын 29-нд Энэтхэгийн хууль ёсоор очихыг хориглосон Норт Сентинел арал руу хууль бусаар зорчсон гэж цагдаагийн газар CNN-д мэдээлсэн байна.  

Энэ арал нь Энэтхэгийн эх газраас 1,200 км орчим зайд орших Андаман, Никобарын бүлэг аралд байрладаг. Энэтхэгийн засгийн газар уг арлыг Сентинел омгийн хүмүүсийн амьдралын хэв маягийг хадгалах, тэднийг орчин үеийн өвчин тахлаас хамгаалах үүднээс зорчихыг хориглодог. Тус омгийнхон гаднын халдварт өвчинд дархлаагүй байж болзошгүй тул тэдэнтэй холбоо тогтоох нь аюултайд тооцогддог байна.

Михаило уг аралд хүрсэн ч Сентинел омгийнхонтой уулзсан нь батлагдаагүй байна. Тэрбээр буцах замдаа нутгийн загасчинтай таарч, хоёр хоногийн дараа баривчлагдсан бөгөөд цагдаа нар түүний завийг мөн хураасан байна. Одоогоор түүнийг ямар нэгэн гэмт хэрэгт буруутгаагүй байгаа аж.  

АНУ-ын Төрийн департаментын төлөөлөгч "АНУ-ын иргэнийг Энэтхэгт саатуулсан тухай мэдээллийг бид авсан" хэмээжээ. Мөн Михаило өмгөөлөгч хөлсөлсөн эсэх нь тодорхойгүй байна.  

Сентинел омгийнхон гадаад ертөнцтэй цөөн удаа харилцаж байсан бөгөөд гаднын хүмүүсийг хүлээн авахгүй дургүй, хүчтэй эсэргүүцдэг гэдгээрээ алдартай. Тус омгийнхны хүн амын тоо тодорхой бус ч хэдэн арваас хэдэн зуу хүртэл байж магадгүй.

Өмнө нь энэ арлыг зорьсон хүмүүс амиа алдсан тохиолдол 2018 онд болсон юм. Тухайн үед Америкийн номлогч Жон Аллен Чау христийн шашны сургаалыг түгээхээр уг аралд очих үедээ нутгийн иргэдийн гарт амиа алдсан байна.

Эх сурвалж: СNN