Монголын загварын ертөнцийн шилдэг моделиуд АНУ-ын Нью-Йорк хотноо есдүгээр сарын 8-10-ны өдрүүдэд болох "New York Couture Fashion Week" загварын долоо хоногт оролцохоор болжээ.

Энэхүү арга хэмжээнд анх удаа Монголын загварын агентлаг тус бүрээс төлөөлөл болсон мэргэжлийн туршлагатай мисс моделиуд оролцож байгаагаараа онцлогтой аж.

Тухайлбал, топ модель Х.Бадамгэрэл,  топ модель Б.Буджаргал, топ модель О.Пүрэвдулам, мисс А.Баярцэцэг, Т.Батцэцэг, Д.Долгион нар "New York Couture Fashion Week"-ийг үүсгэн байгуулагч, дизайнер "Andres Aquino" болон гурван дизайнерийн шинэ цуглуулгыг танилцуулах юм байна.

Тэд энэ пүрэв гарагт АНУ-ыг зорих бөгөөд "Andres Aquino"-гийн бүтээлийг есдүгээр сарын 9-ний өдөр өмсөж, тайзнаа алхах аж.

Топ модель Х.Бадамгэрэл:

"Монгол хэмээн бахархал дүүрэн дуудуулахад бид бэлэн. Эх орноо олон улсын тайзан дээр сурталчлах эрхэм хүндтэй үүрэг хүлээсэндээ баяртай байна" гээд тус арга хэмжээнд моделиудаа холбож, манай талаас зохион байгуулж буй Монголын Үндэсний дизайнеруудын холбооны ерөнхийлөгч Ц.Одонгэрэлд талархсанаа илэрхийлжээ.