ОХУ-ын Новокузнецк хот­ноо болсон оюутны дэлхийн аварга шалгаруулах шатрын тэмцээнд амжилттай оролц­сон манай баг тамирчдыг Биеийн тамир, спортын улсын хороо­ны удирдлагууд өчигдөр хү­лээн авч уулзлаа. Багийн дүнгээр дэлхийн аварга шал­га­руулах тэмцээнээс хүрэл медаль авсан тамирчдыг тус хорооны дээд шагнал Спор­тын алдар одонгоор урам­шуулав. Шагналыг Биеийн тамир, спортын улсын хороо­ны дарга Ч.Наран­баа­тар гар­дуулсан бөгөөд ёсло­лын ажил­лагааны дараа ДАШТ-ий хүрэл медальт фиде мастер Б.Гүндаваатай уулзаж, цөөн хором ярилцлаа.

-Тэмцээний эхэнд тэр­гүүлж явсан. Яагаад байр ухарчихав аа?
-Харин тийм ээ. Эхний өргүүдэд амжилттай тоглож, ДАШТ-ийг тэргүүлэгчийн эг­нээнд явж байлаа. Гэвч тав, зургадугаар өрөгт Оросын хоёр их мастертай таарсан. Нэг өдөр шилдэг шатар­чид­тай дараалан тоглосон боло­хоор хүндхэн өргүүд болсон шүү.

-Алдсан оноогоо нөхөх боломж байсан уу?
-Дандаа чансаатай, шил­дэг шатарчид тул нэг хо­жигдоход л байр ухарч эхэл­дэг. Тиймээс эхнээсээ л хариуц­лагатай тоглох ёстой юм байна.

-Он гарснаас хойш олон улсын хэдэн тэмцээнд орсон бэ?
-Энэ удаагийн дэлхийн аварга гурав дахь нь. Өмнө нь Москвад болсон олон улсын хоёр тэмцээнд нүүсэн.

-Таны чансаа ямар байгаа вэ?
-Дотоод, гадаад гэж хоёр чансаа бий. Би нутагтаа бол бол нэгдүгээрт жагссан байна лээ. Одоогоор улсынхаа хам­гийн өндөр чансаатай шатар­чин гэсэн үг л дээ. Харин гадаад чансаа маань 2320 байгаа. Ирэх сард овоо нэмэг­дээд 2400 болох байх.

-Их мастер цол авахад ойрхон байгаа юм байна шүү дээ?
-Тийм. Гадаад чансаа маань 2500 болбол их масте­рын болзол хангана.

-Одоо ямар тэмцээнд оролцохоор бэлдэж байна?
-Энэ оны аравдугаар сард БНХАУ-ын нийслэл Бээжин хотод дэлхийн оюун ухааны анхдугаар их наадам болно. Үүнд л оролцохоор бэлтгэж байгаа. Мөн дэлхийн шатрын 38 дугаар олимпиад арван­нэг­дүгээр сард явагдах юм. Эд­гээр тэмцээнд гол ан­хаар­лаа хандуулан бэлтгэл сургуу­лил­таа хийж байна.

-Ингэхэд аль сургуульд сурч байгаа вэ?
-“Шихихутуг” хууль зүйн сур­­­гуульд орсон. Оюутан бо­лоод сайхан л байна. Даанч нэг­­­­дү­гээр дамжаандаа ч бү­тэн сууж чадсангүй ээ, энэ жил.

-Хэдэн жил шатар тог­лож байна?
-13 жил.

Б.Бадмаа