Хятад дахь олон улсын брэндүүд жимсний ундаа, косметик, шүдний сойз гэх мэт өдөр тутмын хэрэглээний барааны зах зээлийг дотоодын компаниудад алдаж байгаа нь судалгаанаас харагдав. Мягмар гарагт нийтлэгдсэн өргөн хүрээтэй тайланд гаднын нэртэй брэндүүд дэлхийн хамгийн том хэрэглээний зах зээлд зохицож чадахгүй байгааг дурджээ. Орлого нь өсөж буй Хятадын дунд давхаргын хэрэглэгчид ус, ундаа, шампунь гэх мэт түргэн эргэлттэй барааг үнэтэй брэнд ус дотоодын үйлдвэрлэгчийнхийг худалдан авах нь элбэгшжээ. Ариун цэврийн цаасыг хүртэл хоёр бус, гурван давхаргатайг сонгох болсон аж.

Гэхдээ дотоодын компаниуд тансаг зэрэглэлийн зах зээлийг ч мөн түргэн эзэлж байна. Өнгөрсөн онд олон улсын Nestle, Procter & Gamble, Unilever зэрэг нэртэй брэнд түргэн эргэлттэй барааны 26 ангиллаас 18-д нь зах зээлийн хувь хэмжээгээ алдсан бол дөнгөж дөрөвт нь ахиулсан дүнтэй гарсныг 40000 өрхөд хийсэн судалгаа харууллаа. Хятадын хотуудад Түргэн эрэлттэй барааны зах зээл 2016 онд гурван хувиар өсөж, 190 тэрбум ам.долларт хүрсэн ба Хятадын компаниуд борлуулалтаа найман хувь ахиулсан байхад гадаадын брэндүүдийнх 1.5 хувь нэмэгджээ. Kantar Worldpanel судалгааны төвийн Хятадын салбарын ерөнхий менежер Жейсон Ву “Олон улсын брэндүүд хойшоо ухарч байхад нутгийн компаниуд тансаг зах зээл рүү үсрэлт хийлээ” гэсэн юм.

Хэдийнээс гаднынхны ноёрхолд байсан косметикийн зах зээлд дотоодын үйлдвэрлэгчдийн амжилт хамгийн тод харагддаг. Жишээ нь, хэнд ч танигдаагүй Seeyoung хэмээх нутгийн компани силиконгүй шампунийг гадаадынхнаас урьтаж хэрэглэгчдэд хүргэв. Жимсний шүүсний зах зээлд Huiyua, Nongfu зэрэг дотоодын тоглогч концентратын бус, байгалийн эрүүл шүүс бэлтгэж, уламжлалт ундааг шахсан байна. Ийм бүтээгдэхүүн эрүүл мэндээ анхаардаг дунд давхаргынхны санаанд ихээхэн нийцэж, PepsiCo-ийн Tropicana мэтийн брэндийг ардаа орхилоо.

Дотоодын тоглогчид түүнчлэн өнгөрсөн онд дөрөвний гурваар нэмэгдсэн онлайн худалдааны давуу талыг ашиглаж чадсан юм. “Энэ салбарт нутгийн компаниуд тэргүүлж, гаднын брэндүүдээс хамаагүй түрүүнд онлайн худалдаа хийж эхэлдэг. Нэртэй брэндүүд түргэн өөрчлөгдөж буй зах зээлд зохицохдоо хойрго байна” хэмээн Шанхайд төвтэй судалгааны фирмийн шинжээч Бруно Ланнес дүгнэжээ. Хятадын хэрэглээний бараа үйлдвэрлэгчид голдуу гэр бүлийн компани байдаг тулд дотоод зах зээлд илүү төвлөрч ажилладаг. Гэхдээ тэд өрнөдийн компаниуд шиг технологио шинэчилж чаддаг бол том брэндүүд хүнд сурталдаа автсаар ард хоцордог гэнэ.

China Market Research Group-ийн Шанхай дахь мэргэжилтэн Шон Рейн хэлэхдээ Nestle- ийн Хятадын зах зээлд санал болгосон савтай ус нутгийн үйлдвэрлэгчдийнхээс хямд байсан тул зах зээлээ алдсаныг тэмдэглэв. Түүнчлэн Unilever- ийн нэрийн мөхөөлдөс өрсөлдөгчдийнхөөс дэндүү жижиг, бас дэндүү хямд байсан гэнэ. Ноён Рейн цааш нь “Тэд хятадуудын хувьд дунд зэргийн бүтээгдэхүүн нийлүүлэхийг хүссэн. Гэтэл чанарыг эрхэмлэдэг хүмүүс гадаадын хамгийн сайныг худалдан авах хүсэлтэй байдаг” хэмээн тайлбарлав. Олон улсын брэндүүдийн гол шийдвэрийг Хятадаас гадна гаргадаг тул эндэх хэрэглээний бараа борлуулалтыг саатуулж байгаа бололтой.

Kantar фирмийн дүгнэснээр дээрх үнэлгээ брэндүүдийн хувьд бүхэлдээ бараан гэж үзэж болохгүй. Тэд шар айрагны зах зээлд хувь хэмжээгээ ахиулсан бол Хятадын компаниуд хямдхан гэдэг имижээсээ салахыг эрмэлзэж байна. Түүнчлэн дээд зэрэглэлийн Armani, YSL зэрэг брэндийн гоо сайхны бүтээгдэхүүний борлуулалт өссөн байна. Жишээ нь амны хөндийн арчилгааны зах зээл тансаг хэрэглээ рүү шилжих явцын дунд Phillips-ын цахилгаан шүдний сойз ихээхэн эрэлттэй байжээ. Johnson & Johnson компанийн гадаад инновацийн дэд ерөнхийлөгч Жон Белл “Хятадын хэрэглэгчид маш түргэн өөрчлөгдөж, заримдаа олон жил ашигласан брэндээ сольдог. Иймээс бид илүү сайн хийх, хэрэглэгчдэд нийцүүлэхийг эрмэлзэж байна. Энэ нь бидний хувьд инноваци нэвтрүүлнэ гэсэн үг” хэмээн өгүүллээ.

Том Ханкок