-Чихрийн шижин өвчний хурц цочмог хүндрэлийн үед хоолны эмчилгээг хэрхэн зохицуулах вэ?
-Таны хоолыг бүр мөсөн хорих юмуу, багасгасан юм биш шүү. Танд өргөн сонголт байна. Анхаарлаа хандуулах зүйтэй хэд хэдэн асуудал байна.
Нэг. Хоолондоо та хэрэглэж буй хүнсний зүйлийн төрөл дээрээ анхаарна.
Хоёр. Нэг өдрийн туршид идсэн хоолныхоо тоо хэмжээг анхаарна.
Гурав. Хоногийн тодорхой хугацаанд хоолоо яаж хуваарилахад анхаарна. Сахар бууруулах эм ууж байхад өдөрт таван удаа хооллоно.

-Өдөр бүр хэрэглэх хоолныхоо цагийг зөв зохицуулах шаардлагатай юу?
-Өдөрт хэрэглэх хоолыг 100 хувь гэж үзээд цагаа тохируулж хооллоно.
Өглөөний цай 30 хувь, өдрийн хоол 30 хувь, их үдийн хоол 10 хувь, оройн хоол 20 хувь, хөнгөн хоол 10 хувь. Инсулин тариа хийлгэж байгаа үед өдөрт зургаан удаа хооллоно. Өглөөний цай долоон цагт 20 хувь, бага үдийн цай 10 цагт 10 хувь, өдрийн хоол 13 цагт 30 хувь, их үдийн хоол 16 цагт 10 хувь, оройн хоол 19 цагт 20 хувь, хөнгөн хоол 21 цагт 10 хувь байна.

-Өвчний хурц үед хориглох шаардлагатай хоол гэж байх уу?
-Өөх тосоор баялаг хоолонд: хиам, дотор мах, маргарин, самрын тос, гахайн мах, таван цулын шөл, утсан мах, боодог, лаазалсан мах, хонины мах, шарсан тахиа, давсалсан загас, загасны болон тахианы хальс орох учир хэрэглэхгүй байх хэрэгтэй. Тосонд чанасан боорцог, өрөм, шар тос, цагаан тос, цөрөм, айргийн тос, айраг, чихэрлэг бүх зүйлийг хориглоно. Бүх төрлийн чихэр, чихрийн бүтээгдэхүүн, жигнэмэг, гурилан боов, жимсний чанамал, зөгийн бал, зайрмаг, квас хийжүүлсэн ундаа, сахар ихтэй жимсний шүүс, бялуу, жимсний царцаамал хайлмаг, усан үзэм, гадилыг хориглоно.
Мөн бүх төрлийн амтлагчийг хориглоно. Үүнд: Сүмс, жан, цуу, халуун ногоо орно.

-Өвчтөний хоолыг хэрхэн бэлтгэх аргачлалын тухай та зөвлөөч...
-Хоолыг шинээр бэлтгэнэ. Хагас боловсруулсан бүтээгдэхүүн хэрэглэж болохгүй. Давсыг бага хэрэглэнэ. Хоолыг усанд чанасан эсвэл ууранд жигнэж боловсруулах нь илүү тохиромжтой.

-Өвчний үед хэрэглэхэд хүлээн зөвшөөрөгдсөн хоол...
-Ислэг ихтэй хоолыг өргөн хэрэглэнэ. Хоол хүнсний дотор агуулагдаж буй удаан боловсрогдох хэсгүүд буюу ургамлын ширхэгүүдийг ислэг гэнэ. Ислэг ихтэй хоолонд: хар гурил, хар талх, хивэг, хөц будаа, алим, лийр, өргөст хэмх, байцаа, вандуй, лууван, хөх тарианы гурил, талх орно. Булчин махаар хийсэн хоол хэрэглэнэ.

-Тэгвэл ямар хоол хэрэглэхийг хориглох вэ?
-Дотор мах, гахайн утсан мах, галуу, нугас, нухаш, үхрийн утсан мах, сосиск, өөхтэй мах, консерв, давсалсан загас, тахианы хальс, өөхтэй борц хэрэглэхийг хориглоно. Мөн гурилан бүтээгдэхүүнээс дээд гурил, чихэрлэг гурилан бүтээгдэхүүн, жигнэмэг, бялуу, амьтны гаралтай тосонд шарсан боорцог, сүү сүүн бүтээгдэхүүнээс: айраг, хуурай сүү, удаан хадгалсан өрөм, өтгөрүүлсэн чихэртэй сүү, гүүний саам, айргийн тос, тослог ихтэй йогурт хэрэглэхийг хориглоно.