Дотоодын ачаа тээврийг нэгдсэн зохицуулалтад оруулан тээш хадгалах, хүлээн авах, хүлээлгэн өгөх нэгэн шинэ үйлчилгээ Сонгинохайрхан автобуудал буюу Драгон төвд өнөөдрөөс нэвтэрч байна. "Автотээврийн үндэсний төв" ТӨҮГ, Монгол Шуудан ХК хамтран "Гараас гарт, хаалганаас хаалганд" гэсэн уриатайгаар ачаа тээш хүргэлтийн шинэ үйлчилгээг нэвтрүүллээ.

Өмнө нь иргэдийн ачаа тээшийг хувиараа тээвэрлэгчид “дайвар” маягаар зөөвөрлөдөг байсан. Тэгвэл энэхүү үйлчилгээ нээгдсэнээр нэгдсэн зохион байгуулалттай, даатгалтай, баталгаатай тээвэрлэлт хийгдэх юм.

Энэ үйлчилгээнд хамрагдахын тулд иргэд ачаа тээшээ өөрт ойрхон байрлах “Монгол шуудан” ХК-ийн салбар болон авто буудлын ачаа илгээмжийн хэсэгт хүлээлгэн өгөх хэрэгтэй аж. Мөн 1800-1636 утсаар дуудлага өгч тээш хариуцсан ажилтанд хүлээлгэн өгөх боломжтой.

Ингэснээр иргэдийн ачаа тээш “Монгол шуудан” ХК-ийн нийслэл хот дахь 30, орон нутаг дахь 389 салбараар дамжин бүх сум сууринд шуурхай, найдвартай хүрэх юм байна.

Гэрэл зургийг Б.Бямба-Очир