Торонтогийн Хөрөнгийн биржид бүртгэлтэй “Prophecy Development” компани АНУ-ын Невада мужид хэрэгжүүлж байгаа ванадийн “Gibelline” төслийг худалдан авах эцсийн шатны хэлэлцээрт орсон талаараа мэдээллээ. Энэ хүрээнд тус компани нийт гурван сая ам.долларын төлбөр хийнэ. Төлбөрөө хийж дуусах хүртлээ тодорхой давтамжтайгаар нэмэлт төлбөрүүдийг төлөх үүрэг хүлээж байгаа аж. “Prophecy Development”-ын хувьд Монголд Улаан Овоогийн дулааны нүүрсний ордоос гадна Чандганы дулааны цахилгаан станцын төслийг хэрэгжүүлж байгаа юм.

Торонтогийн Хөрөнгийн биржид бүртгэлтэй “Sandstorm” компани I улирлын тайлангаа танилцууллаа. Тайлант хугацаанд тус компани 18.8 сая ам.долларын орлого олсон нь 2016 оны мөн үеэс 40 хувиар нэмэгдсэн байна. Алтны гарц нь 15.5 мянган унц болсон, мөн бэлэн мөнгөний урсгал нь 22.6 хувиар нэмэгдэж, 11.9 сая ам.доллар болсон талаар тайландаа дурджээ. “Sandstorm”-ийн хувьд Оюутолгой дахь Hugo North, Heruga ордуудын 20 хувийг эзэмшиж байгаа “Entree Gold” компанитай байгуулсан тусгай гэрээнийхээ хүрээнд эдгээр талбайгаас олборлох алтны 5.62 хувь, мөнгөний 4.26 хувьтай тэнцэх бүтээгдэхүүнийг худалдан авах юм. Тийм учраас “Turquoise Hill Resources” компани “Hugo North”, “Heruga “ордуудыг багтаасан Оюутолгойн техникийн тайланг саяхан танилцуулсан гэдгийг “Sandstorm” тайландаа онцолжээ.

TRQ: Тавдугаар сарын 15-нд I улирлын санхүүгийн тайлангаа танилцуулна

Торонтогийн Хөрөнгийн биржид бүртгэлтэй “Оюу Толгой”-ийн хөрөнгө оруулагч “Turquoise Hill Resources “компани тавдугаар сарын 15-нд буюу ирэх даваа гарагт I улирлын санхүүгийн тайлангаа танилцуулахаар төлөвлөсөн байна.

Т.Элиса