-Английн хоёрдугаар лигийн аваргаар шаазгайнууд тодорчээ-

Өнгөрсөн улиралд Английн Премьер лигээс доош унасан Ньюкасл Юнайтед клуб эцсийн мөчид Английн 2-р лиг буюу Чампионшип дивизоны аваргаар тодорчээ.

Тэд сүүлийн тойрогт Барнсли клубтэй тоглосон бөгөөд Аяозэ Пэрэз, Чансэл Мбэмба, Дуайт Гэйл нарын гоолоор өрсөлдөгчөө 3-0 харьцаатай буулган авсан.

Харин энэ тоглолттой зэрэгцэн болсон Астон Вилла болон Брайтон Хов Албион тоглолтоос Брайтон оноо алдвал Ньюкасл түрүүлэх байсан юм.

Брайтоноос Глэнн Мюррэй торгуулийн цохилтоор гоол оруулж Брайтон тоглолтыг тэргүүлж байсан бөгөөд Астон Вилла 60 дахь минутанд 10-уулаа болсон ч тоглолтын 89 дэх минутад Жэк Грэйлиш Виллагийн төлөө гоолдож 1-1 харьцаатай тоглолт өндөрлөжээ.

Улмаар Ньюкасл Юнайтед ийнхүү лигийн түрүү хүртээд байна. Ньюкасл Юнайтед өнгөрсөн улиралд доош унаснаасаа хойш 12 тамирчинг 50 сая паундаар багтаа нэгтгэсэн. Гэхдээ Андрос Таунсэнд, Моусса Сиссоко, Жиоржинио Вияналдум нараа тэд зарсан ч ийнхүү ердөө нэг улирлын дараа Премьер лигт эргэн тоглохоор боллоо. Мөн тэдний хувьд улирлын эхний 2 тоглолтонд хожигдсон ч чампионшипт түрүүлсэн түүхэн дэх гурав дахь баг болж байгаа юм.

Эх сурвалж: SPS