Их, дээд сургуулиудад дизайны мэргэжлээр сурч буй оюутнуудын дунд “Алтан хулгана” тэмцээнийг зохион байгуулдаг уламжлалтай.

Энэ жилийн наадмыг Hunnu Mall худалдааны төвд тавдугаар сарын 6,7-ны өдрүүдэд явуулах бөгөөд оюутан сурагчдын бүтээлээр “Экспо” үзэсгэлэн дэлгэж, оюутнуудын дунд илтгэл, хэлэлцүүлэг явагдаж, мөн монгол наадгай тоглоомыг хүүхэд багачуудад таниулах, тоглуулах, урлаг соёлын олон сонирхолтой арга хэмжээ зохиох гэж байна.

Оюутан залуусын чөлөөт сэтгэлгээ, уран бүтээлийн онцлогийг харуулах, бүтээлч хандлагыг дэмжих, дизайныг тодорхойлсон бодлого концептийг нийтэд түгээх, сургалтын онцлогийг таниулах зорилготойгоор  жил бүр Шинжлэх Ухаан Технологийн Их Сургуулийн харьяа Үйлдвэрлэлийн Технологийн сургуулиас санаачлан явуулж ирсэн билээ.

Уг тэмцээнийг 2005 оноос хойш зохион явуулж ирсэн бөгөөд жилд  500 гаруй оюутны 150-200 бүтээл өрсөлдөж, 50,000-100,000 оюутан залуусын хүртээл болдог томоохон наадам болон хэвшсэн юм.

“АЛТАН ХУЛГАНА-2017” ТЭМЦЭЭНИЙ ОНЦЛОГ ЮУ ВЭ?

“Алтан хулгана-2017” наадам нь “Бидний соёл” сэдвийн хүрээнд  монгол агуулга, сэтгэлгээг тусгасан бүтээлүүдээр зохион байгуулна.

Visual communication design, Interior design, Product design-ы төрлүүдэд оюутан, сурагчдын 120 гаруй бүтээл энэ жилийн наадамд өрсөлдөхөөр ирээд байна.

Өмнөх жилүүдэд оюутан, сурагчдын ирүүлсэн бүтээлүүдээр үзэсгэлэн гаргаж, шалгаруулалтаа явуулдаг байсан бол энэ жилийн хувьд “Алтан хулгана-2017” наадмын хүрээг өргөжүүлж, “Дизайны тулгамдсан асуудал” сэдэвт эрдэм шинжилгээний хурал болж, мэргэжил тус бүрээс илтгэл тавьж, “Бидний соёл” сэдвийн дор дизайны тэмцээн зохион байгуулна.

“Алтан хулгана” наадмаас шалгарсан бүтээлийг Япон улсын Ивате хотын их сургуулиас Азийн орнуудын оюутнуудын дунд зохион байгуулдаг “ART & TOHOKU” наадамд оролцуулахаар явуулдаг бөгөөд тус наадмаас “Олон улсын шагнал”, “Шүүгчийн шагнал”, “Тусгай байрын шагнал”-уудыг жил бүр хүртэж ирсэн болно.

“Алтан хулгана” наадмын хүрээнд оюутан, сурагчдын бүтээлийн үзэсгэлэн дэглэгдэж тавигдах бөгөөд уг бүтээлийн танилцуулгыг наадмын шагнал гардуулах ёслол дээр бүрэн эхээр нь үзүүлж танилцуулна.

“АЛТАН ХУЛГАНА-2016” НААДМЫН ШИЛДЭГ БҮТЭЭЛҮҮД

Дүрийн шийдэл төрлийн тэргүүн байрыг ШУТИС-ҮТС-КГД-4 Б.Ананд - ЭРЛЭГ НОМУН ХААН
 

БҮТЭЭГДЭХҮҮНИЙ ГЭРЭЛ ЗУРАГ төрлийн тэргүүн байрыг ШУТИС-ҮТС-4 "HOOGINS" – ЛАПША
 

ТОГЛООМЫН ДИЗАЙН төрлийн тэргүүн байрыг ШУТИС-ҮТС-КГД-4 Э.Луубаатар - ХУРД

ВЕБ БОЛОН ПРОГРАМЫН ДИЗАЙН төрлийн тэргүүн байрыг ШУТИС-ҮТС-КГД-4 "Бид ялав баг" - ЖАНЧХҮҮГИЙН ДАВААНЫ ТУЛААН

ХОЛБОО БАРИХ:
Yйлдвэрлэлийн технологийн сургууль, 8-р хороо, Бага тойруу, Сvхбаатар дvvрэг, Улаанбаатар, Монгол улс.
Утас: 99141728, 99197162, 99062211

www.facebook.com/altanhulgana