УИХ-ын чуулганы өнөөдрийн нэгдсэн хуралдаанаар Зөрчлийн тухай хуулийн шинэчилсэн найруулгын анхны төслийг хэлэлцэнэ. 240 хууль тогтоомжоор хүлээсэн үүргээ биелүүлээгүйгээс үүсч байгаа зөрчлүүдийг энэ хуульд нэгтгэж зохицуулахаараа шинэчилсэн найруулгын төсөл онцлогтой аж.

Зөрчлийн хууль батлагдсанаар 27 байгууллагын эрх бүхий албан тушаалтнууд 600 гаруй зөрчилд хариуцлага хүлээлгэнэ гэдгийг хууль санаачлагчид онцолсон. Тэгвэл та бидний зайлшгүй мэдэх ёстой Зөрчлийн тухай хуулийн онцлох заалтуудыг хүргэж байна.

-Олон нийтийн газар, авто зам, орон сууцны орчны газар, гудамж, талбайд бие зассан, эсхүл нус, цэр, тамхины иш, хог хаясан бол хүнийг 10 000 төгрөгөөр торгоно.

-Ажил, үйлдвэрлэлийн зайлшгүй шаардлагатай нөхцөл, эсхүл заншлын дагуу хэрэглэж байгаагаас бусад тохиолдолд хот, суурин газарт биедээ хутга, эсхүл хүний биед гэмтэл учруулж болох тусгайлан бэлтгэсэн зэвсгийн чанартай зүйл авч явсан бол зэвсэг, хэрэгслийг хурааж, 25 000 төгрөгөөр торгоно.

-Гэр бүлийн хүчирхийллийн талаар хуулиар хүлээсэн мэдээлэх үүргээ биелүүлээгүй бол 50 000 төгрөгөөр торгоно.

-Нийтийн зориулалттай орон сууцанд шөнийн цагаар бусад оршин суугчдын амгалан тайван байдлыг алдагдуулсан хүнийг 100 000 төгрөгөөр, хуулийн этгээдийг нэг сая төгрөгөөр торгоно.

-Мөрийтэй тоглоомын газар байгуулсан, эсхүл ажиллуулсан бол иргэнийг 2 сая төгрөгөөр, хуулийн этгээдийг 20 сая төгрөгөөр торгоно.

-Хуулиар хориглосон газарт, эрх бүхий байгууллагад мэдэгдэлгүйгээр жагсаал, цуглаан зохион байгуулсан, эсхүл жагсаал, цуглааны явцад түүний зорилгыг өөрчилж хориглосон жагсаал, цуглаан зохион байгуулсан бол учруулсан хохирол, нөхөн төлбөрийг гаргуулж хүнийг 150 000 төгрөгөөр, хуулийн этгээдийг 1.5 сая төгрөгөөр торгоно.

-Хог хаягдлыг зориулалтын цэгээс бусад газарт хаясан бол учруулсан хохирол, нөхөн төлбөрийг гаргуулж иргэнийг 30 000 төгрөгөөр, хуулийн этгээдийг 300 000 төгрөгөөр торгоно.

-Хог хаягдлыг ил задгай шатаасан бол учруулсан хохирол, нөхөн төлбөрийг гаргуулж хүнийг 50 000 төгрөгөөр, хуулийн этгээдийг 500 000 төгрөгөөр торгоно.

-Утаат тамхи татахыг хориглосон газарт тамхи татсан, эсхүл татах боломж олгосон бол хүнийг хорин таван нэгжтэй тэнцэх хэмжээний төгрөгөөр, хуулийн этгээдийг 500 000 төгрөгөөр торгоно

-Мэргэшсэн эмч, эсхүл резидент эмч нь хуульд заасан үүргээ биелүүлээгүй бол учруулсан хохирол, нөхөн төлбөрийг гаргуулж, тодорхой мэргэжлийн үйл ажиллагаа явуулах эрхийг нэг жил хүртэл хугацаагаар хасаж иргэнийг нэг сая төгрөгөөр торгоно.

-Эмнэлгийн болон төрөх үеийн яаралтай тусламжийг тухайн иргэнд хамгийн ойр байгаа эрүүл мэндийн байгууллага үзүүлэх үүргээ биелүүлээгүй бол учруулсан хохирол, нөхөн төлбөрийг гаргуулж, тодорхой мэргэжлийн үйл ажиллагаа явуулах эрхийг нэг жил хүртэл хугацаагаар хасаж иргэнийг 200 000 төгрөгөөр, хуулийн этгээдийг 2 сая төгрөгөөр торгоно.