Анх Боёотой хамтарч хамтлаг байгуулж байсан сонин түүхтэй жүжигчин  П.Эрдэнэзаан өдгөө хошин урлагт өөрийн байр сууриа олсон "Маск" продакшныг уран бүтээлийн гар нийлсэн андууд болох С.Мөнхсайхан, М.Баярмагнай хоёртой хамтран байгуулсан түүхтэй.

Тун богинохон хугацаанд хүчээ авч авъяаслаг залуусыг эгнээндээ нэгтгэж ёстой л нийгмээ мэдэрч шинийг сэтгэж тайзнаа тавьдгаараа бусдаас ялгардаг. Хэдийгээр жүжигчдийн ажил нойр хоолгүй ажилладаг нь хэцүү ч жүжигчин П.Эрдэнэзааныг харин ч энэ тал дээр царай алддаггүй гэх юм билээ.

Түүний гэргий М.Энхнар гэж хөгжим бүжгийн коллежид багшилдаг сайхан эмэгтэй бий. Анхны хүүгээ төрөхөд нь харах гэж яарсандаа төрөх эмнэлгийн цонхыг цөм цохиж байсан мань эр эхнэртээ дөрвөн хүүхдийн захиалга өгч байсан бол эднийх одоо нэг хүү, хоёр охинтой. П.Эрдэнэзаан дөрөвдүгээр сарын нэгэнд төрсөн гээд бодоход үнэхээр түүнийг хувь заяа нь хөтөлсөн гэлтэй.