УИХ-ын Аюулгүй байдал, гадаад бодлогын байнгын хорооны өчигдрийн хуралдаанаар Монгол Улсын Засгийн газар, Бүгд Найрамдах Польш Улсын Засгийн газар хоорондын нөхцөлт зээлийн ерөнхий хэлэлцээрийн төслийг хэлэлцэв.

Польшийн Засгийн газар, Монгол Улсын хөдөө аж ахуй, дэд бүтэц, боловсролын шинэчлэл, байгаль орчныг хамгаалах салбарын төслүүдийн санхүүжилтэд зориулж 50 сая хүртэлх еврогийн экспортын зээлийг Монгол Улсын Засгийн газарт олгохоор шийдвэрлэжээ. Зээлийн хүү /жилийн/ 0.15 хувь, зээлийн хугацаа 28 жил ба үндсэн төлбөрөөс чөлөөлөгдөх хугацаа таван жил байна. Түүнчлэн энэхүү зээлийг Польш Улсаас Монгол Улсад нийлүүлэх бараа, үйлчилгээний гэрээний үнийн дүнг 100 хувь санхүүжүүлэхэд ашиглах юм байна.

Хэлэлцэж буй асуудалтай холбогдуулан УИХ-ын гишүүд байр сууриа илэрхийллээ. УИХ-ын гишүүн Д.Цогтбаатар тус зээлийг олон салбарт бус цөөн тооны чанартай салбарт хөрөнгө оруулах хэрэгтэй гэв. Харин УИХ-ын гишүүн С.Батболд, Ц.Цогзолмаа нар Монгол Улс гадаад улс орнуудаас зээл авч, төсөл хэрэгжүүлэхдээ ЖДҮ-ийн бодлогыг дэмжих зарчим баримтлах нь зүйтэй гэжээ.

Монгол, Польшийн Засгийн газар хоорондын нөхцөлт зээлийн ерөнхий хэлэлцээрийн төслийг дэмжиж, Монгол Улсын Засгийн газарт гарын үсэг зурахыг зөвшөөрье гэсэн томьёоллоор санал хураахад хуралдаанд оролцсон гишүүд 100 хувийн саналтайгаар дэмжсэн байна.