VII хороолол, Сансарын зарим байрт халаалт доголдож байгаа талаарх иргэдийн гомдол тасрахгүй байна. Энэ талаар "Улаанбаатар дулааны сүлжээ" компанийн ерөнхий инженер Ш.Мөнхжаргалаас тодрууллаа.

-Иргэдээс халаалт ирэхгүй байгаа гэсэн гомдол ирэх боллоо. Нийслэлийн хэмжээнд халаалт доголдож байгаа байрууд бий юу?
-Одоогийн байдлаар сүлжээний халуун 100 хэм, хэвийн байна. Халаалт ирэхгүй байгаа нь тухайн байруудын орон сууцны конторуудтай холбоотой.

-Тэгэхээр танайхаас хамаарсан ямар ч зүйл байхгүй гэсэн үг үү?  
-Тийм ээ.

-Тохируулга хийж байгаа учраас халаалт доголдсон гэж иргэдэд хэлсэн байсан. Тохируулгыг хэзээ хийж дуусах вэ?
-Дуусч байгаа.

-Халаалт доголдсон нь орон сууцны компаниуд засвар үйлчилгээгээ муу хийсэн гэж ойлгож болох уу?
-Биднээс хамаараагүй байхад доголдол гарах нь орон сууцны контортой л холбоотой. Тэд шугам сүлжээндээ засвар үйлчилгээ сайн хийсэн бол доголдол гарахгүй.

-Их өртэй хэд хэдэн орон сууцны контор байсан. Тэдний халаалтыг өгсөн үү?
-Гэрээ байгуулаад халаалтыг нь өгсөн. Арванхоёрдугаар сар дуустал өрөө сар бүр хувааж төлөх юм.

-Speak out-

Б.Цэнд: Ойрдоо бүлээн төдий л байгаа
(Баянзүрх дүүргийн XVIII хорооны иргэн)

-Танай байрны халаалт ямар байна вэ?
-Ойрдоо бүлээн төдий л байгаа. Сайн халахгүй л байна. Юунаас болоод ингэдэг юм бүү мэд.

-Өнгөрсөн сард халаалт өгч эхлэхэд ямар байсан бэ?
-Анх сайн халж байсан. Өнгөрсөн долоо хоногоос л муу халдаг болсон.

Д.Долсонжав: Доголдол гараагүй
(Чингэлтэй дүүргийн I хорооны иргэн)

-Танайх аль байр вэ. Халаалт ямар байна вэ?
-М100 дугаар байранд оршин суудаг. Манай халаалт хэвийн байгаа.

-Бага тойруугийн байрны оршин суугчид ойрд халаалт муу байна гэж их гомдоллож байгаа. Танай халаалт өмнө нь доголдож байсан уу?
-Ерөөсөө доголдоогүй. Харин зарим байрны халаалт ирэхгүй байна гэж ярьж байсан.

З.Амараа: Бага тойруугийн байрнууд хүйтэн
(Сонгинохайрхан дүүргийн XIII хорооны иргэн)

-Халаалт муу байна гэсэн гомдол иргэдээс тасрахгүй байна. Танай байр ямар байгаа вэ?
-Энэ хавиар халаалт хэвийн байгаа. Оршин суугчид гомдол гаргахгүй л байна. Харин Бага тойруугийн байрууд их хүйтэн байгаа.

-Бага тойрууд танай хамаатных байдаг юм уу?
-Үгүй ээ. Манайх тэнд цайны газар ажиллуулдаг. Хүйтэн болохоор хүмүүс ч тогтохгүй юм.

О.Баяр: Халахгүй байгаа нь хүйтэрч байгаагаас болсон байх
(Чингэлтэй дүүргийн VI хорооны иргэн)

-Та хэддүгээр байранд амьдардаг вэ. Халаалт хэвийн байна уу?
-45 дугаар байрных. Сайн халдаг байснаа саяхнаас амьтай төдий л байгаа. Гадаа хүйтэрч байгаа болохоор сайн халахгүй байгаа байх.

-Танайх цахилгаан халаагуур хэрэглэдэг үү?
-Үгүй. Халаалт хэвийн байдаг учраас хэрэглэх шаардлагагүй. Харин манай охиных VII хороололд (Монгол III сургууль) байдаг. Байнга л цахилгаан халаагуур залгадаг.

Б.Мягмансанж