Ерөнхийлөгчийн суудлаасаа огцроод буй Пак Гын Хэ прокурорын албатай хамтран ажиллахад бэлэн гэдгээ илэрхийлсэн хэмээн Өмнөд Солонгосын Ёнхап агентлаг мэдээллээ.

Солонгосын иргэдийн бухимдлыг төрүүлж, Пак Гын Хэг Ерөнхийлөгчийн албан тушаалаас нь огцруулах гол шалтгаан болсон авлигын хэргийн талаар Прокурорын газраас байцаалт авах аж.

Түүнчлэн Пак Гын Хэг сэжигтний хувиар энэ сарын 21-нд байцаалт өгөх юм байна. Пак Гын Хэгийн өмгөөлөгчдийн нэг Сон Бём Гю “Хатагтай Пак Гын Хэ тухайн нөхцөл байдлаас хамааран хэргийг шалгаж буй хүмүүстэй хамтран ажиллах болно” гэж хэлсэн байна.

Үндсэн хуулийн цэцийн шийдвэр хараахан гараагүй байхад Пак Гын Хэ прокурорын албатай хамтран ажиллах болно гэж мэдэгдэж байсан ч удалгүй хэлсэн үгнээсээ татгалзсан билээ. Тэрбээр Өмнөд Солонгосын түүхэнд ардчилсан сонгуулиар сонгогдож, огцорсон анхны Ерөнхийлөгч хэмээн бичигдэж байгаа юм.

Өнгөрсөн ням гарагт тэрээр Ерөнхийлөгчийн ордноос Сөүлийн Ганнам дүүрэг дэх гэртээ жирийн иргэний хувиар эргэн ирсэн байна. Ерөнхийлөгчийн албан тушаалаас огцорсноор түүний халдашгүй эрх үгүй болж, яллагдагчаар татагдах боломжтой болсон билээ.

Пак Гын Хэ өөрийн төлөөлөгчөөр дамжуулан бүрэн эрхийн хугацаагаа дуусгаж чадаагүйдээ уучлалт хүсэн, хэргийн үнэн мөн нь илэрнэ гэдэгт найдаж байгаагаа хэлсэн юм. Прокурорын тусгай баг Пак Гын Хэг найз Чой Сун Шилтэй хуйвалдаж, томоохон компаниудыг дарамталж төрийн бус байгууллагуудад их хэмжээний мөнгө хандивлахыг шахсан, мөн найз Чой Сун Шилийг улсын хэрэгт оролцуулсан зэрэг хэрэгт буруутгаж байгаа аж.

Чой Сун Шил болон Пак Гын Хэ нар хоёул буруугүй гэдгээ удаа дараа мэдэгдээд буй юм. Самсунг группийн удирдагч Ли Жэ Ёнийг мөн л Пак Гын Хэгийн хэрэгт холбогдуулан шалгаж байгаа ба түүнийг авлигын хэрэгт буруутгаж байгаа юм. Тэрээр мөн л адил өөрийгөө буруугүй хэмээн мэдэгдээд байгаа билээ.

Эх сурвалж: CNN