УИХ-ын гишүүн Р.Раш энэ долоо хоногийн эхний өдөр ихэд бухимджээ. Тэрээр бүлгийн хуралдааны ирц бүрдэхгүй байсанд "Гишүүд айлчлал дагаж явахын оронд ажлаа хийх хэрэгтэй шүү дээ. Ерөнхий сайд, Их хурлын дарга гадаадад айлчлаа л биз. Тэднийг дагаж явах юун дуртай юм. Бөөн асуудал болж байж явдаг юм гэсэн. Ард нь төрийн ажил хэцүүдлээ" хэмээн унтууцсан байна.

Үнэхээр ч Ерөнхий сайдын хойд хөршид, УИХ-ын даргын Энэтхэг. Вьетнамд хийсэн айлчлал давхацахад Төрийн ордон эзгүй шахуу болов.

УИХ-ын дарга Д.Дэмбэрэлийг гэхэд 14 гишүүн дагаж яваа гэнэ. Мөн Ерөнхий сайдтай нийлээд есөн гишүүн ОХУ-д яваа. Түүнээс цөөнгүй гишүүн Германд айлчилж байгаа зэргээр УИХ-ын 20 гаруй гишүүн гадаадад галуу шувууны мах зооглож явна.

Харин ард нь байнгын хороодын ирц бүрдэхгүй ажил цалгардаж, чуулган ганцхан хэлэлцэх асуудалтай өдрийг барж байна. Зөвхөн өчигдрийн УИХ-ын чуулганд гэхэд 39 гишүүн ирсэн гэж бүртгүүлсэн ч танхимд 10 гаруйхан гишүүн л хуралдаж байлаа.

Уржигдар Эдийн засгийн байнгын хороо ирц хүрээгүйгээс хуралдаагүй. Энэ мэтээр төрийн ажил гишүүдийн айлчлалаас болж хойшилсоор л байна.

Намайг бага байхад аав, ээжийгээ дагаж айлд очих гэхээр "Хүн дагадаг нохой шиг яах гээв гээд л зэмлэдэг байж билээ. Энэ үгийг харин эрхэм гишүүдэд хэлмээр байна.

Мэдээж төрийн түшээ хүн гадаадын улс орнуудад зочилж, айлчлах шаардлага гарна, түүндээ ч явалгүй л яахав. Гэхдээ заавал Ерөнхийлөгч, УИХ-ын дарга, Ерөнхий сайд дагаж тийм олноороо явах хэрэг байхгүй санагдана. Дарга дагаж явсан гишүүн болгон хэлэлцээр хийж, гарын үсэг зурахгүйгээс хойш. Үнэндээ төрийн гурван өндөрлөг дагаж явахад "томчуудын" уулзалтын ард бараа бологчийн л үүрэг гүйцэтгэдэг шүү дээ. Тиймээс айлчлалд "шаардлагагүй" гишүүдийг үлдээж, ажлыг нь хийлгэдэг болъё.

УИХ-ын гишүүн хууль батлах үүрэгтэй. Ажлын шаардлагаар гадаад дотоод явахыг нь буруутгаагүй ч дарга дагаж явдаг байдлаа больвол яасан юм бэ.

Төрийн айлчлал болдог жамаараа болж л таарна. Төрийн түшээд минь, Шаргал ордон дахь ажил чинь хэцүүдлээ.

Б.Оргил