Австрали-Монголын эдийн засаг, худалдаа,хөрөнгө оруулалтын харилцан ашигтай хамтын ажиллагааг хөхүүлэн дэмжих үндсэн чиг үүрэг бүхий “Австрали Монголын Бизнес Зөвлөл” 2014 оны 1 дүгээр сарын 28-нд албан ёсоор байгуулагджээ.

Тус зөвлөл Австралийн Хөрөнгө ба Хөрөнгө оруулалтын хороонд бүртгүүлсэн байна. ТУЗ-ын даргаар дэлхийд нэр хүндтэй Австралийн “Минтер Эллисон” компанийн Олон улсын салбар хариуцсан захирал Марк Грийн сонгогджээ.

Сүүлийн жилүүдэд Австрали Улсаас Монголд хөрөнгө оруулах сонирхол нэмэгдэж, эдүгээ Австралийн 30 гаруй компани төлөөлөгчийн газраа Улаанбаатарт байгуулан, Австралийн 170 гаруй жижиг, дунд компани Монголтой холбогдсон үйл ажиллагаа явуулах болжээ.

Австралид суугаа Монголын ЭСЯ-ны зүгээс тус зөвлөлийг байгуулах санал, санаачлагыг дэмжин ажилласан юм байна. Тус зөвлөлөөс ойрын хугацаанд Монголд бизнес хийх боломжийг таниулсан хэд хэдэн арга хэмжээг Австралид зохион  байгуулахаар төлөвлөөд байна.