УИХ-ын чуулганы өнөөдрийн /2025.06.03/ нэгдсэн хуралдаанаар Ерөнхий сайдын 2025 оны 5-р сарын 28-ны өдөр УИХ-д оруулсан Итгэл үзүүлэх тогтоолын төслийг хэлэлцэж байна. 

УИХ-ын гишүүн Ч.Лодойсамбуу 2 триллион төгрөгөөр УИХ-ын гишүүдийн саналыг худалдаж авах гэсэн мэдээллийг цахим хуудаснаа нийтэлснийг УИХ-ын хэд хэдэн гишүүн нэр хүндэд халдлаа гэж дургүйцлээ илэрхийлсэн. 

УИХ-ын гишүүн Ч.Лодойсамбуу, Юун түрүүнд гишүүдийнхээ санаа зовинол, эгдүүг хүргэсэндээ чин сэтгэлээсээ уучлал хүсэж байна. Хоёрдугаар Монгол Улсын Их хурлын гишүүд монгол хэлээрээ зөв бичиж, зөв уншиж, зөв сонсоод сурчих хэрэгтэй. 

Би сураг шүү гэж тодорхой хэлсэн. Монголд хүн сургаар юм сонсоод тэрэндээ итгээд, тэрийгээ ярих эрх байдаг биз дээ. Энэ сураг биш байлаа гэж бодъё. Чихэн дээр шуугисан салхи байсан ч би итгэнэ. 

Би улстөрийн мэдээлэлтэй маш ойрхон 10 гаруй жил ажилласан. Манай гишүүдийн зарим нь мартсан ч байх. 60 тэрбумын хэрэг, Хөгжлийн банкны асуудал, ЖДҮ энэ бүхнийг мартсан байх. Хамгийн сүүлийн жишээ, ЖДҮ-ийг хөгжүүлэх сангаас 900, 950 саяар нь тэгш хуваарилж байх тэр үед Монголд нэг ширхэг ч мега төсөл байгаагүй. Өнөөдөр улсын 14, хотын 24 мега төсөлд хэдэн зуун триллионы асуудал яригдаж байгаа. Би тийм учраас энэ сурагт итгэсэн, итгэснийг минь уучлаарай.