Кембриж Монгол форум 2-ыг энэ сарын 19,20-ны өдрүүдэд Улаанбаатар хотноо зохион байгууллаа.

Хоёр жилд нэг удаа болдог Кембриж Монголын хоёр дахь удаагийн форум нь “Дэлхийн асуудал, нүүдэлчдийн шийдэл” сэдвээр болж, нүүдэлчдийн уламжлал нь орчин үеийн дэлхийн асуудлуудад хэрхэн шинэлэг шийдлүүдийг санал болгож болох талаар хэлэлцлээ.

Форумд оролцогчид Чингис хаан ба нүүдлийн соёл иргэншил нь Монголын төдийгүй дайн тулаан, уур амьсгалын өөрчлөлт зэрэг өнөөгийн дэлхий нийтэд тулгамдсан асуудлуудад шийдэл олоход чухал ач холбогдолтойг үнэлж, Монголын шинэ алсын харааны талаар хэлэлцсэн юм.

Соёл судлалын ухааны доктор, профессор Ж.Долгорсүрэн “Хуралд 20 гаруй орны эрдэмтэд, судлаачид ирсэн. Бид 20 гаруй хэлэлцүүлэг  өрнүүллээ. Үүнээс дурдвал хүн байгаль хоёр холбоотой байж, хэрхэн зүй зохистой харьцдаг байсан соёлын уламжлал одоо хэрхэн өөрчлөгдөж байгааг хөндсөн.

 Жишээ нь монголын нийт ард түмэн төв суурин руу төвлөрч, шинжлэх ухаан, техник технологи хөгжих хэрээр бидний уламжлалт амьдралд асар их өөрчлөлтийг авчирч байна. Энэ хэлэлцүүлгүүдийн үр дүнд өөр өөр мэргэжлийн эрдэмтэд хамтраад нийгэм соёл болон улс төрийн асуудлыг хамт ярилцаад, нийгмийн хөгжилд хэрэг болохуйц гарцыг санал болгож байна.

Мөн Монгол олон улсын геополитикийн бодлогоо хэрхэн цааш авч явах талаар ч хэлэлцлээ. Төв Азийн орнууд буюу адил нүүдэлчин соёлтой орнуудтай дөрөвдөгч хөршийн хүрээнд, соёл, хэл, уламжлалаараа хамтарч болох уу гэсэн асуудал яригдлаа.

Соёл, спорт, аялал жуулчлал, залуучуудын яам, Кембрижийн их сургуулийн Монгол ба Дотоод Ази судлалын төв, ЮНЕСКО-ийн ивээл дор Нүүдлийн соёл иргэншлийг судлах олон улсын хүрээлэн, Монгол Улсын Их Сургуулийн Монгол судлалын хүрээлэн, Чингис хааны өв соёлын хүрээлэн, Сити их сургууль, Монгол уран зургийн галерей хамтран форумыг зохион байгуулжээ.

Б.Энхням